I austritiki strategija usi inklusijona le Romendar, ojs palvakeripe upro EU-jakere keriptscha, ar dim uli. 2021 o bajder keripe 10 berschenge ar kerdo ulo. O la strategijake scheroskero taj kordinacijonakero than ando bundakero kancleriskero birovtschago, hi o than le flogoskere grupnengere kojenge, kaj jek afka akardo „Romengero-kontaktoskero than“ kerdo ulo. Uso arparujipeskero koja maschkar o mindenfelitike keraschkiji taj keraschtscha, i afka akardi dialogoskeri seletoskeri forma kerdi uli. Oja ando 24to april 2023, akan imar 30var sina, sar i Michaela Brunner taj i Simone Daxecker, phukan.
Radijo „Roma sam“ | 8to maj 2023 | 20:50 orenge
Duach i sendung vodinel Susanne Horvath | Live Radio Burgenland
Ando lejcti bersch upri universiteta Betschi i afka akardi Sensiro-schtudija angle terdschardi uli. O resultatscha jek bulho kojengero kipo la situacijatar le Romendar taj Sintijendar andi Austrija sikan. Scheroskero kritikakero punkto, hi o and granicalimo bulhipe la strategijatar. Ada te upre jek bulhipeskero telgranicalipe la Romengera dialogoskera seletoskera formatar otscha sikal. Uso prik beschipe upre ada, ham te upro punktscha sastipe taj atschipe, diklo te ol.
O Roland Hanak andar o bundakero ministerijum la butjake taj la virtschoftake, o nevo ardipe „Romengeri sor le butjakere foroske 2022-2030" angle terdschartscha. O ardipe uso Roma taj Sinti pe irinel, save schpecifischi butjakere foroskere problemtschenca reste hi taj o usedschajipe uso butjakero foro taj uso khetanipe, lokeder lenge te kerel.
O cil hi, o usedschajipe le Romendar taj Sintijendar uso butjakere foroskere politischi pomoschage, dugeder cajt, upre te likerel. Afka, valami desch projekti, jeka projektoskera cajtaha 24 masektschendar, pomoschago te uschtiden. Sa khetan, schtar pomoschagoskere perijodi use mindig duj berscha, ari an. Vasch i strategija le Diversity Managementistar, o duach mukipe asaj projektendar ande avre institucjontscha del, sar o Roland Hanak phukal.
Kaj pomoschago te del, iste ando projekti, 50 procenti la pherda cajtakera ekvivalentatar, le Romendar taj Sintijendar pherdo ol. Te i dschuvlengeri kvota ando projekti taj uso ciliskere grupn le projektendar, telal 50 procenti te na paschlol. O Hanak dschanel, hot Roma taj Sinti usar o berotinipeskero than, karijera schaj keren. Te te ando keripeskere organisacijontscha, vudartscha lenge prade terdschon.