Sa khetan, ando 1990te berscha, 25 lilengere bombi ar bitschade taj trin bombi upre terdscharde ule. Duach aja faphageripeskeri serija, schtar manuscha murdarde taj deschutrin, but lendar igen sorale, dukade ule. Ando artschijipe dschene uso alav peren, hatek afka sar i burgenlanditiki horvackija Terezija Stoisits. „Me o terdschijiptscha igen sorale esbe lijom. Taj oda te vaschoda, kaj te mange jek lilengeri bomba bitschadi uli, savi ham, le Devleske palikerav, schoha aun na ali“, phenel i Stoisits.
Palgondolipe upro darja
O artschijipe na gondolinel tschak upro bibastale tradiptscha le rechtsekstremi teroristar pal, hatek te upri dar pal dikel, savi le austritike tschuliptschen but berscha vodintscha. „O atentato jek koja odolestar sina, kaj phendo ol, hot akan papal gejng o Roma dschan. O naprindschardo adaj sina“, phenel o Andreas Sarközi, botakero vodaschi le kulturakere farajnistar le austritike Romendar.
O artschijipe te le phutschajipeske palal dschal, sar o terdschijiptscha odola cajtatar adi ando gondo le manuschendar hi, phenel i kuratorkija Corneli Kogoj. „Soske hi jek teror, savo akan eknaj phureder sar tranda berscha hi, na presenti ando pradimo esbe lipe?“, afka i Kogoj.
O artschijipe ando Flogoskero Kundejakero Museum dschi ando august te dikel hi. Paloda, o artschijipe ande Klagenfurt taj ando kesdipe le berschestar 2025 ando Pradimo Kher Erba (OHO), te dikel hi.