But voja taj baro interesi jek nevi tschib te siklol, sikade o deschuduj dschuvla taj murscha uso Burgenland-Romani kurs Erbate. Jekoschne alava sar o feschtovtscha, o gende vaj o akariptscha, siklim ule.
Radijo „Roma sam“ | 6to maj 2024 | 20:50 orenge
Duach i sendung vodinel Susanne Horvath | Live Radio Burgenland
Poarenge ando kurs erschtivar hi, hot la tschibtschaha Romani ando kontakto an. O dschene butvar pedar i pisinipeskeri forma perpleksi hi, savi eknaj la nimtschka tschibtschake aun paschlardi hi. Taj te uso ungriko taj horvacko, o avre burgenlanditike flogoskere grupnengere tschibtscha, o dschuvla taj murscha glajchi koji esbe line.
I Susanne Horvath o kurs tel likertscha. I Erbaschkija sajt buteder sar bisch berscha andi ORF Romengeri-redakcijona ojs radijoskeri moderatorkija butschalinen taj i kurkoskeri radijoskeri sendung „Roma sam“ kerel. Oj sako di ande lakeri buti taj khere lakera familijaha Romani vakerel. I Burgenland Romni i tschib lakera babatar taj lakere papustar siklini. „Amari tschib jek barikano falato amara kultureli identitetatar hi, savi me igen patijarav“, phenel i Susanne Horvath.
I Roma VHS Burgenland imar sajt but berscha Burgenland-Romani kurstscha kerel. „On use te ledschen, i fogosimi tschib anglo meripe upre te likerel. Taj te jek kultureli dipe kerdo te ol, kaj te avre manuscha buteder pedar i tschib taj afka te pedar i kultura la flogoskera grupnatar le Romendar te siklol te dschanen“, phenel o Feri Janoska, anglebeschaschi la Roma VHS-atar Burgenland.
Kaj o interesi asaj baro hi i tschib te siklol, o Burgenland-Romani kurstscha usar o septemberi bajder te dschan taj le kursiskere dschene o schajipe te ol, upro imar dschando siklipe, upre te bauninel.