I Central European universiteta (CEU) jek austritiki privati universiteta hi, savi duach o austritiko akreditirinipeskero birovtschago AQ-Austrija, adaj akreditirim hi. O falato ando 10to gemajndakero becirk BetschistE, akan le thanenca ande Budapest taj New York, bulhardo ol. Dim on englitike tschibtschakere schtudiji taj akademischi bajder sikadipeskere programtscha.
Radijo „Roma sam“ | 29to april 2024 | 20:50 orenge
Duach i sendung vodinel Susanne Horvath | Live Radio Burgenland
Roma Graduate Preparation programo
O Roma Graduate Preparation programo (RGPP) jek dipe Romenge taj Romnjenge hi, sar i Angéla Kóczé, akademischi vodaschkija andar o Roma Graduate Preparation Program, phukal.
I Angéla Kóczé asitencakeri profesorkija le Romani schtudijenge hi, anglebeschaschkija ando Romani Studies Program taj akademischi vodaschkija ando Roma Graduate Preparation programo upri Central European universiteta.
O scheroskero koja le keripeske adale schpecijeli programostar, paschlol andi aun likerdi diskriminacija taj ando teldikipe le Romendar taj Romnjendar. Adaj vasch jek intensivi 10-masektschengero programo dschal, savo absolventkijen taj absolventschen vodinel, pe vasch thana ando masteriskere schtudijumiskere koji upre internacijonali aun prindscharde universitetscha, te beverbinel.
Advanced Certificate programo ande Romani schtudiji
Pasche o Roma Graduate Preparation Program i CEU jek interdisciplineri koncipirimo programo del, o Advanced Certificate Program ande Romani-schtudiji. Adaj o schtudentscha le tematschenca uso glajchi terdschojipe, usi socijali inklusijona taj uso diversitetakero keripe, donde pumen bescharen. O schtudentkiji taj schtudentscha ham te upro vodinipe sikadipeskere- taj forschinipeskere projektendar, vodim on. O Roma Graduate Preparation programo use Roma taj Romnja pe irinel, save imar jek Bachelor-schtudijum kisetinde taj saven interesi upri socijali- taj gondoskeri visenschoft hi. Afka o schtudentscha upre jek bajder sikadipeskero schtudijum ande jek lendar ar rodimo fochiskero than, vodim on. Peda ari, o anglutno programo o englitiko tschibtschakero dschanipe le schtudentschendar feder kerel. Ada le schudijumiskere bajder naschipeske igen barikano hi. Ham te Romanes-tschibtschakere kurstscha dim on, sar o Donald Myrteli phukal.
Maschkar o programo siklon o schtudentscha pe kritischi le politischi, virtschoftlichi taj socijali situacijenca le Romendar, donde te bescharel. Ada butvar ande seminartscha hi, save o schtudijum la historijatar taj la identitetatar terne entviklinptschenca ando politischi umdschajipe le Romenca, khetan phandel. Ham te o akor aun phandlo dipe le Master-schtudijumiske upri CEU than del, pe hatek adale tematschenca visenschoftlichi donde te bescharel.
Le akan duj terdschojipeskere thanenca ando vodschi la Europatar – Betschi taj Budapest – o kultureli taj socijali mindenfelitiko adala regijonatar ando schtudijumiskere koji jeke historischi taj globali dikipeha khetan phandlo te ol, sar andar i universitetakeri rik butschol. Le neve terdschojipeskere thaneha Betschiste, andi cukunft te Romen taj Romnjen andar i maschkarutni- taj vest Europa la CEU-jake te jerinel kamna. Mint, afka i Kóczé, hi o pomoschago le Romenge taj o entviklinipe le Romani-schtudijendar upri Central European universiteta, jek falato andar o Alma Mater gondo.