„Forum4Burgenland“ | Tschibtschakero sikadipe usar i tschavengeri bar dschi usi utschi ischkola

Kada o „Forum4Burgenland“ kerdo ulo, o cil peske beschardo ulo, hot o burgenlanditike flogoskere grupnengere tschibtscha ando pradipe feder esbe te lel hi taj ando sikadipeskero than soraleder te on. I Privati Pedagogischi Utschi Ischkola Burgenland meschtertschen ar sikal, save ando duj tschibtschakero ischkolakero koja o flogoskere grupnengere tschibtscha sikan. Pasche andi „tschibtschakeri verkschtot“, khetan le flogoskere grupnengere fatreterenca, siklipeskere materijaltscha le ischkolaschkijenge taj ischkolaschtschenge kerde on. I Andrea Bicsar, schero le centrumistar la inklusijonake taj le but tschibtschakere vakeripeske andi Privati Pedagogischi Utschi Ischkola Tikni Martona, uso adaberschengero talalinipe, o nevo projekto „Mindig but tschibtschakero vakeripe“ angle terdschartscha. „Kaj elementarpedagogischi fochiskere sorja pomoschago te uschtiden, i Privati Pedagogischi Utschi Ischkola Burgenland, andi koperacijona le thaneha Burgenland taj la universitetaha Klagenfurt, ada nevo schibtschakero koncepto kertscha“, phentscha i Andrea Bicsar ande lakeri presentacija.

Jek avro sikadipeskero dipe le burgenlanditike flogoskere grupnenge usar o ischkolakero bersch 2024/25 ando gimnasijum Uprutni Pulja te del. „mi4mi“ o nevo pharipeskero punkto butschola. O tschibtschakero siklipe andi horvacki tschib, ande Burgenland-Romani, andi ungriki taj hianzischi tschib, pomoschago te uschtidel taj te soraleder kerdo te ol. „Igen barikano hi, hot o neve siklipeskere plantscha le flogoskere grupnengere tschibtschenge ale. On akan andi implementirinipeskeri fasa hi“, afka i Karin Vukman-Artner, schero le tschuliptschengere ischkolakere kojaske andi sikadipeskeri direkcijona Burgenland.

Imar angle 25 berscha o tschuliptschengero ischkolakero tschatschipe ando parlamento ar kerdo ulo. Adaleha phendo ulo, hot sakone ischkolaschi o tschatschipe hi, o flogoskere grupnengere tschibtscha horvacko, ungriko taj Burgenland-Romani andi ischkola te siklol. Andi tschib Burgenland-Romani, siklipeskere materijaltscha la tschavengera barake del taj andi flogoskeri ischkola, i tschib ojs naphandli ora tel likerdi ol. „Barikano hi, hot le tschavenge imar andi elementarakeri pedagogik o flogoskere grupnengere tschibtscha pasche anen taj len afka te ande lengeri identiteta soraljaren“, phenel o Emmerich Gärtner-Horvath, bajrotiskero anglebeschaschi la flogoskera grupnatar le Romendar.

I seletoskeri forma „Forum4Burgenland“ ando bersch 2019 upri inicijativa la Privati Pedagogischi Utscha Ischkolatar Burgenland, la sikadipeskera direkcijonatar Burgenland taj le burgenlanditike flogoskere grupnengere fatreterendar kerdi uli.