Upro adaberschengero Romaball o cile thana bikende sina taj adale kiratiske o khelipeskero than schoha schutscho nana. Latsche hangoha, latscha muschikaha taj jek naphandle khetanipeha, sikatscha pe o adaberschengero tradicijoneli mulatintschago. „Ada o jekoschno Romaball hi, savo andi Austrija sako bersch mulatim o taj te mindig jek kesdipe hi, la sako berschengera flogoskera grupnakera butjatar“, phenel o Martin Horvath, patijardo botakero vodaschi le farajnistar HANGO Roma.
Radijo „Roma sam“ | 26to feberi 2024 | 20:50 orenge
Duach i sendung vodinel Susanne Horvath | Live Radio Burgenland
Telal o gondo 35 berscha Romengero-micinipe, o 31to Romaball mulatim ulo. O mulatintschago i kultura la flogoskera grupnatar ando pradipe dschivdon te kerel taj Roma taj gadsche khetan te phandel. Agun o Roma lengeri kultura garuvnahi. „Le keriptschenca le erschti Romengere organisacijendar phentscham, hot amari kultura le pradipeske sikavas“, afka o Emmerich Gärtner-Horvath, anglebeschaschi le flogoskere grupnengere bajrotistar le Romendar.
Latscho hango telal o kherodaschtscha ande pasche o burgenlanditike Romengere bandi Romano Rath taj i Leon Berger banda, te i Bela Horvath banda andar o Ungriko taj o dschilaschi Frankie Martin, savo le kherodaschtschen leskere dschilenca upro khelipeskero than cidija. Le scheroske le kulturakere farajnistar le austritike Romendar, Christian Klippl, o Romaball jek barikano kultureli sikavipe la flogoskera grupnatar le Romendar hi.
O barikanipe te ada bersch o prikdipe la koronatar le Romaball kiraliske taj la Romaball kiralkijake sina. O adaberschengere kiraliskere dschene hi i Alisha Unger taj o Steven Karolyi. Le dujen akan o barikano upredipe hi, lengera flogoskera grupn ando pradipe te fatretinel.
O Romball ando kulturakero kher Tenu Erbate jek barikanipe sina. Roma taj gadsche khetan dschi hora ratschaske mulatinde taj khelde.