Radijo „Roma sam“ | 12to feberi 2024 | 20:50 orenge
Duach i sendung vodinel Susanne Horvath | Live Radio Burgenland
O atentato angle 29 berscha, na dur bejg la Romengera-sidlungatar Erbate, la cila Austrija dschangartscha. Kada o schtar murscha – Erwin Horvath, Karl Horvath, Josef Simon taj Peter Sarközi jek tablina le rasistischi pisinipeha „Roma pal andi Indija“ bejg te lel kamnahi, jek bomba eksplodirintscha. I Manuela Horvath, vodaschkija la Romengera-pastoralatar, o sako berschengero gondolipeskero mulatintschago organisirinel. „O gondolipeskero mulatintschago te organisirinel, mange jek emocijonali upredipe hi, mint me uso atentato duj familijakere dschene naschatscham“, phenel i Manuela Horvath.
I Romengeri-pastoral la diöcesejatar Tikni Martona, mindig te terne dschene la flogoskera grupnatar ando sako berschengero gondolipeskero mulatintschago ande phandel. Adabersch, i 15-berschengeri Lea Heider, sorale adala temaha donde pe beschartscha. I ischkolaschkija Erbate andi Romengeri-sidlung atschel taj le gondolipeskere mulatintschagoske, jek vakeripe ar butschalintscha. „Pekamlo hi, hot amen te ada falato la austritika historijatar te prindscharel siklojas taj andral siklojas, mint o atentato sikatscha, kaj o rasismus otscha vodinel“, phenel i Lea Heider.
O ökumenischi molinipe o superintendento Robert Jonischkeit taj o baro raschaj Franz Scharl, kerde. „O sako berschengero gondolipeskero mulatintschago upro schtar atentatoskere opfertscha jek barikano akcento hi, hot obocht dim iste ol, mint o rasismus ande ada them meg dschil. Odoj otscha diklo iste ol, kaj o rasismus kesdinel taj gejng oda, iste valaso kerdo ol“, phenel o baro raschaj Franz Scharl.
O Roma, save erscht duj berscha anglo atentato ojs flogoskeri grupn aun prindscharde ule, erschtivar ando pradipe pele. I politik taj o khetanipe, akan la flogoskera grupn le Romendar, dikla. „O dschene avrijal ule taj upri flogoskeri grupn buteder use gele. Len akan te odole problemtschenge interesi sina, save pumen ando naschipe la cajtatar entviklinde. Amen putriptscha rodijam taj te laklam, obste akan upro thana la thaneskera- vaj la bundakera politikatar“, phenel o Emmerich Gärtner-Horvath, bajrotiskero anglebeschaschi la flogoskera grupnatar le Romendar.
Uso gondolipeskero mulatintschago te i thaneskeri rotkija Doris Prohaska (SPÖ), o thaneskero rot Wolfgang Spitzmüller (Selene) taj o biro Erbatar, Georg Rosner (ÖVP), use sina. I muschika uso gondolipe kertscha i „Post Meridiem banda“.