O terdschijipe la familijatar Ujvari andar Halbturn
Amen kesdinas i erschti sendung ando nevo bersch amara serijaha „Upro jomi le Romengere-sidlungtschendar ando Burgenland“. Ande aja serija la butvar pobisterda historijaha le burgenlanditike Romendar donde amen bescharas taj upre sikavas, hot o Roma taj o Romnja sajt schelberschengere jek falato le Burgenlandistar hi. Ando adiveseskero ardipe le bibastale terschijipeha la familijatar Ujvari andar Halbturn ando becirk Neusiedl am See, donde amen bescharas.
Flogoskero grupnengero di ando parlamento
Asaj koja na del sako di. Ando parlamento, jek di, o cile flogoskere grupn ando maschkarutno punkto terdschonahi. Jek barikano dikipe adaj, la flogoskera grupnake le Romendar dija. Flogoskere grupnengere fatreterkiji taj -fatretertscha khetan lengere aunpaschlojiptscha taj mangiptscha le politikertschenge schaj prik dine: Jek barikani tema, taj oja imar sajt berscha, hi o tschibtschakero uprelikeripe. O adale diveseske kerdo artschijipe „O austritiko ROMANES. 30 berscha aunprindscharipe – 600 berscha andi Austrija“ ando parlamento premijera mulatintscha.
Sintijengero-kulturakero di
O tschibtschakero uprelikeripe te but farajntschenge andi erschti rik terdschol, afka te le jekoschne Sintijengere-farajniske andi Austrija „Newo Ziro“. Sajt berscha le kultureli famitlinipeske taj le uprelikeripeske la tschibtschatar andbescharipe del. Uso mualtintschage le farajnistar, sar o Sintijengero-kulturakero di, barikano upri muschika ojs famitlerkija beschardo ol: Ada bersch muguli jek premijera dija – schaj, hot le Seimen Mettbachiskeri muschika andi Austrija nan asaj prindschardi sar andi Germanija. Ada schaj pe akan irinel, mint o dschilaschi taj muschikaschi ando keripe le Sintijengere-kulturakere dijestar, pro erschti koncerto andi Austrija dija.
Ischkolakero projekto la organisacijatar ERINNERN:AT
O Roma taj o Sinti ando historijakero sikajipe ando austritike ischkoli butvar tschak igen tschule akarde on. Ada avrijal te ol: „Erinnern.at“ jek programo la organisacijatar OeAD – Österreichs Agentur für Bidung und Internationalisierung, ada bersch o upre butschalinipe le genocidistar upro Roma taj Sinti ando nacijonalsocijalismus ojs berscheskero pharipeskero punkto ar dija. So tschatschikan planim hi, use jek informacijakero mulatintschago ando khera le kulturakere farajnistar le austritike Romendar, phukado ulo.
Nevi kenva „Gleiche unter Gleichen“
Ando lejcti bersch, mulatinde o Roma taj o Sinti o 30-berschengero jubilejum ojs flogoskeri grupn. O aunprindscharipe jek barikano koja sina. Uso proceso, savo uso aunprindscharipe vodintscha, flogoskere grupnengere dschene use sina, afka sar te fatretertscha la politikatar taj but aktivistscha. Pedar ada butvar barano drom, savo akor uso aunprindscharipe ojs flogoskeri grupn andi Austrija vodintscha, akan te jek kenva ari ali, savi le pomoschagoha le historikeristar Gerhard Baumgartner, le kulturakere farajnistar le austritike Romendar ar dim uli.