Organisirim le farajnistar Romano Svato, o internacijonali Romengero-teateriskero-festivalo ando „Dschungel“ Betschiste, insceniriniptscha, keriptscha, inschtalacijontscha taj jek genipe sikatscha. O keraschkiji le farajnistar Romano Svato, i Simonida taj i Sandra Selimovic hi. O hangi le dschuvlendar angle te asdel, jek lengere aunpaschlojipestar hi. Ham te Romen taj Romnjen andar i LGBTIQ+ grupn, te vakerel te mukel kamna.
Radijo „Roma sam“ | 15to jeneri 2024 | 20:50 orenge
Duach i sendung vodinel Susanne Horvath | Live Radio Burgenland
Ojs sorale Romnja khelen taj phagen o phenja Selimovic le klischejenca. Pomoschago uschtidine on akan te la aktivistkijatar taj Romnjatar Laura Moldovan. Lakere keripeha „Decode your Prophecy“, gadschen lengere teldikipeskere kojenca gejng Roma taj Romnja, konfrontirintscha.
Le pharipeskere punktoha upro mindenfelitiko, ada bersch na tschak upri diskriminacija le Romnjendar sikado ulo, hatek te upro buterava diskriminicirinipe odole flogoskere grupnengere dschenendar, save na le heteronormativi kipenca ando glajchi hango terdschon. Le genipeha le Gianni Jovanovicistar, Romen taj Romnjen andar i LGBTIQ+ grupn, ando udud terdscharde.
„Me, jek tschau le tikne tschulipestar“, i erschti kenva le Gianni Jovanovicistar hi. Ande leskero autobijografischi verk, pedar leskero dschivipe ojs Rom taj barikano ojs tatoschi pisinel.
Botaschi, aktivisto, pisimaschi taj komikeri
14 berschenca iste ov sohartscha. Na dur paloda, sina ov dad duj tschavendar. Le Jovanoviciske ada terschiijipe, andi historija taj ando sistematischi tradipe le Romendar taj Sintijendar and baunim hi.
O Jovanovic phenel, hot ov ande duj patrijarchali kulturtscha upre bartschino – ande oja le nimtschkendar taj le Romendar. Ande leskeri ajgeni familija leskero phukajipe, hot ov tatoschi hi, o kipo le murschikanipestar irintscha.
O Jovanovic, savo diskriminacija ando sikadipeskero than terdschivtscha, schofintsch le, i ischkola te kisetinel taj jek butjakero arsiklipe te kerel. Sikadipe le glajchi terdschojipeske igen barikano hi, phenel o aktivisto.