O Roma taj o Sinti sajt 600 berscha andi Austrija dschin. Maschkar o nacijonalsocijalismus, bojd i cili flogoskeri grupn murdardi uli. O tschave taj tschaja le prik dschivdendar, hatek o terne Roma taj Sinti, iste vasch o politischi taj khetanipeskero hango, sorale kejmpfinde. On adaj, pomoschago but dschenendar, save latsche usi flogoskeri grupn terdschonahi, uschtidine.
O drom uso aunprindscharipe, afka phendo schaj ol, o erschti keripe terne Romendar taj Sintijendar andi Austrija sina. Barikane dschene sina adaj o profesori Rudolf Sarközi, o Emmerich Gärtner-Horvath, i Susanne Baranyai, i profesorkija Ceija Stojka, o Hugo Taubmann, o Eduard Karolyi, o Ilija Jovanović taj but avre. On le cilenge idoltscha sina taj hi, save adi aja barikani flogoskeri grupnengeri buti, savi adala dschene kesdinde, bajder keren.
Adi o jeriniptscha le lejcti tranda berschendar mulatinas. Ham obocht dipe pekamlo hi, mint o rasismus taj i diskriminacija papal buteder on. Vaschoda, iste amen amaro hango bajder asdas taj khetan gejng o argranicalipe iste kejmpfinas taj le tschatschiptschenge le Romenge taj Sintijenge, sorale ande iste amen bescharas.