Prado ulo o Roma-Advent la „Post Meridiem bandatar“. O duj terne burgenlanditike imar sajt lengeri ischkolakeri cajt pumen prindscharen taj lengeri banda maschkar i maturakeri roas, kerde. Dschilenca sar „Rockin’Around the Christmas Tree“ vaj „Leise rieselt der Schnee“ – dschilado ande Burgenland-Romani, on anglutno botschitschano hango telal o kherodaschtscha ledschine.
Radijo „Roma sam“ | 25to decemberi 2023 | 20:50 orenge
Duach i sendung vodinel Susanne Horvath | Live Radio Burgenland
Latscho hango upre alo, kada o pisimaschi taj reporteri Konstantin Milena Vlasich, jek pisimo tekst pedar o ando bersch 2019 mulo Romengero-muschikaschi Stefan „Pisti“ Horvath, gentscha. „Ov jek barikano muschikaschi sina taj me use leskero lejcti baro cidipe use somahi, so man akor micintscha, ada tekst pedar leste te pisinel“, phenel o Vlasich.
O barikanipe le kiratistar uso ada berschengero Roma-Advent, sina i presentacija la erschti duj tschibtschakera thajipeskera kenvatar le farajnistar HANGO Roma. „Romano Habe – Die traditionelle Küche der Roma“, savi le Martin Horvathistar taj leskera dschuvlatar Kerstin, kerdi uli.
Paloda le kherodaschtschen o schajipe sina, habiptscha andar i Romengeri-kojnha, o lek kamleder receptscha andar i thajipeskeri kenva, te probalinel. „Boboskere matschiki“, „Letscho á la Roma“ taj „Guschumani sumi“, savi pal jek tradicijoneli recepto la 73-berschengera Romnjatar Erika Horvath thadi uli, delahi.
Ando kisetinipe le Roma-Adventistar, o burgenlanditike Romengere-bandi „Romano Rath“ taj i „Leon Berger banda“ latscho hango telal o kherodaschtscha ande. O mulatintschago andi koperacijona le OHO-jiha Erba kerdo ulo taj le bundakere kancleriskere birovtschagostar Austrija, la kulturatar Burgenland taj le cukunftakere fondsistar la republikatar Austrija, pomoschago uschtidija.