Angle 30 berscha, o Roma taj o Sinti ojs schovti flogoskeri grupn andi Austrija aun prindscharde ule. Sajt oja cajt, but irintscha pe. But farajntscha kerde ule, save le mindenfelitike tematschenca taj aunpaschlojiptschenca, la flogoskera grupn ando pradipe fatretinen. Butvar ando Burgenland, but feder ulo. Mindenfelitike teldikipeskere strukturtscha taj anticiganismus, ham meg adi ande but khetanipeskere strukturtscha del, phenel o Andreas Lehner, anglebeschaschi la Roma VHS-atar Burgenland.
Radijo „Roma sam“ | 24to april 2023 | 20:50 orenge
Duach i sendung vodinel Susanne Horvath | Live Radio Burgenland
O meg mindig dime teldikipeskere strukturtscha, ischkolaschkijen taj ischkolaschtschen ande lengeri sikadipeskeri karijera upre likeren. But pedagogkiji andi Austrija igen tschulo le historijakere kojastar la flogoskera grupntar prindscharen taj akor te butvar
te pomoschinel na dschanen pumenge, te use rasistischi vaj anticiganistischi prik astariptscha ando ischkoli alo, afka i Nina Ibrahimi, meschterkija andi Europitiki Maschkarutni Ischkola Erba.
O „SENSIRO-forschinipeskero phukajipe“ uso evalujirinipe la nacijonali Romengera strategijatar sikal, hot latsche koji le siklipeske pal i ischkola le Romnjenge taj Romenge del, akfa sar o siklipeskero pomoschago le farajnistar Roma-Service Erbate vaj le farajnistar Romano Centro Betschiste – odoleske ham te na glajchi koji taj jek marginalisirinipe la tschibtschatar, prik terdschon. „Sakone jekoschne tschaveske soraleder pomoschim iste ovlahi taj odoleske sikajaschtscha pekamle hi, save esbe len, te diskriminacija dija taj save dschanen, sar odolaha buti kerdo iste ol“, phenel i Sabine Weisz, rektorkija la Pedagogischi Utscha Ischkolatar Burgenland.
O neve sikavipeskere plantscha, save sajt o kesdipe adale berschestar prik bescharde on, buteder than andi buti la diversitetaha taj la diskriminacijaha te den, afka o Markus Benesch, grupnakero schero le bundakere ministerijumistar le sikadipeske, la visenschoftake taj le forschinipeske.
Jek party, o Internacijonali Romengero Di ando Pradimo Kher Erba, kaj Roma taj gadsche o 30-berschengero jubilejum le aunprindscharipestar la flogoskera grupnatar le Romendar andi Austrija mulatinde, te kisetinel mukla. O latscho hango kertscha i prindschardi DJane Melinda Stoika. Oj le kherodaschtschenge Romengeri-muschika taj dschila andar o lejcti deschberschengere, upre tschivlahi.