Le Romengere advent imar sajt buteder sar desch berscha del. Pradim ulo o mindenfelitiko flogoskere grupnengero mulatintschago, fatreterendar andar i politik taj le patijarde botakere vodaschistar le farajnistar HANGO Roma, Martin Horvath. O Romengero advent o lejcti mulatintschago le berschestar andi flogoskeri grupnengeri buti la Romengera organisacijatar hi, taj te odoleske hi lo, o kerdo taj terdschivdo le cile berschestar, papal upre te dschil te mukel.
Radijo „Roma sam“ | 12to decemberi 2022 | 20:50 orenge
Duach i sendung vodinel Susanne Horvath | Live Radio Burgenland
Uso ada berschengero Romengero advent, o farajn HANGO Roma, leskero muschikakero projekto „Terne Roma“, presentirintscha. Tschaven taj ternen adaj o schajipe hi, i basis la muschikatar te prindscharel te siklo, phenel o muschikakero meschteri Leon Berger, savo le terne flogoskere grupnengere fatreterenca but siklino taj boschitschano hango uso Romengero advent 2022, kertscha. Le projektoha „Terne Roma“ i tschib taj i kultura la arta generacijonake bajder dim te ol, afka o Leon Berger.
Boschitschano hango uso Romengero advent kertscha te o pisimaschi, Samuel Mago. O dujto presidento le erschti austritike ternengere farajnistar „HÖR“, imar schtar kenvi pisintscha taj ov andar pri lek neveder kenva „tela muri morti“, andi nimtschki tschib „unter meiner Haut“, gentscha.
Jek genipe dija te la presidentkijatar le farajnistar „HÖR“, Sladjana Mirković. Oj falati andar i kenva „War das jetzt rassistisch“ gentscha. Ande aja kenva, rasismusiskere ekspertscha palvakeripe upre mindenfelitike etnijakere phutschajiptscha dine, afka sar, „Katar tu tschatschikan ajs?“ vaj „Soske tu asaj latsche i nimtschki tschib vakeres“. I serbitiki austritiki Romni, Sladjana Mirković, o Romengero falato pisintscha. Lakero phutschajipe butscholahi: „Dschin o cile Romnja taj Roma ande atschipeskere verdi?“
I muschika adale mulatintschagostar kerde o burgenlanditike Romengere bandi „Romano Rath“ taj i „Leon Berger Band“.
O kherodaschtscha poroti tschinahi, o mindenfelitiko kultureli programo, o barikano hango taj o tradicijoneli habe andar i Romengeri kojnha, te islinel pumenge mukle.