Jek baro kamipe la Anna Puggleratar hi, vargaji te rodel. Imar ojs tikni tschaj meresch lakera dajaha taj lakere dadeha ando vesch dschalahi taj odoj huhura, gulubici vaj vargaji khetan kedlahi. Khere akor latscho habe le vargajenca thavlahi, le dschendeske and len fadschinlahi vaj eknaj, pajtaschtschenge taj familijakere dschenenge delahi.
Radijo „Roma sam“ | 29to august 2022 | 20:50 orenge
Duach i sendung vodinel Susanne Horvath | Live Radio Burgenland
Lakeri daj taj lakero dad ando logeri sina taj phare traumatisirim odola cajtatar. La daj buti nana taj vaschoda te kudulinel iste dschalahi, kaj le tschaven schaj hahavlahi. O dad butvar ojs erntinipeskero pomoschagoschi butschalinlahi. Ando Romengero jarko Schtegate, i Romni igen meresch dschivlahi. Upri ischkolakeri cajt, ham na gondolinel mersch pal, mint o tschave la flogoskera grupnatar le Romendar, phare diskriminirim taj te marde ule. Sik ojs na latsche ischkolaschtscha andi sonderschul te ispidim le ule. La Puggler vasch lakeri etnija o schajipe nana, jek arsiklipe te kerel taj vaschoda iste oj pe pomoschagoskere butjenca andi gastronomija taj ando flejginipeskero than, duach tschalavlahi.
I Anna Puggler but bibast ande lakero dschivipe terdschivtscha. Ando bersch 2007 lakero mursch mulo taj schtar berscha paloda, lakeri kamli tschaj Sabine. Tschak 36 berschenca, vasch pharo nasvalipe, muli.
Adi i Anna Puggler buter ando Romengero jarko Schtegate na dschil, kaj oj taj lakero mursch, kada lo meg dschivlahi, jek kher avral i Romengeri sidlung, kinde. I pensijonistkija tschak lakere tschauiha ando kher dschil. I sako diveseskeri buti ando phuripe mindig phareder lake perel taj lakero tschau, vasch mindenfelitike nasvaliptscha, tschak tschulo lake schaj pomoschinel. O aktujeli kutschiptscha igen phare la resen, kekaj afka hi, i Anna Puggler jek igen vojaschni dschuvli hi, savi pro dschivipe ojs pensijonistkija kamel.