O Forum4Burgenland andar jek khetan butschalinipe la Privati Pedagogischi Utschi Ischkolatar Burgenland le fatreterenca taj fatreterkijenca le flogoskere grupnendar taj la sikadipeskera direkcijonaha Burgenland ari alo. O ar dimo cil hi o upre likeripe la dajakera tschibtschatar, butvar o Romani, phenel i rektorkija la Privati Pedagogischi Utscha Ischkolatar Burgenland, Sabine Weisz.
„Tschak khetan schaj valaso schofim ol“
„Tschak khetan schaj valaso schofim ol“, phenel te o sikadipeskero direktori le Burgenlandistar, Heinz Josef Zitz. Vaschoda o Forum4Burgenland taj o khetan butschalinipe le jekoschne thanendar barikano hi, o flogoskere grupnengere tschibtscha upre te likerel. Adaj te vasch i irinipeskero virkinipe la ischkolatar taj le khetanipestar dschal: Mint o tschibtscha iste te avral i ischkola vakerde on, afka o Zitz.
„Amen iste terne Romenge taj Romnjenge lengeri identiteta pal das“
O flogoskere grupnakere fatretertscha taj fatreterkiji uso mulatintschago „Burgenlanditike dschivipeskere themtscha“ jek hi, hot koji pekamle hi, o flogoskere grupnengere tschibtscha upre te likerel. Baro gondolipe upre terne berschardo ol, kaj ham butvar terne Roma taj Romnja te andi cukunft meg avre koji iste schofinen. Mint on meg mindig diskriminacijendar reste hi, afka o anglebeschaschi le flogoskere grupnakere bajrotistar le Romendar, Emmerich Gärtner-Horvath.
Radijo „Roma sam“ | 6to juni 2022 | 20:50 orenge
Duach i sendung vodinel Susanne Horvath | Live Radio Burgenland
Pasche o dschene le Forumistar4Burgenland, te ischkolaschtscha taj ischkolaschkiji uso alav ale, save pumen vasch „100 berscha Burgenland“, le flogoskere grupnenca le Burgenlandistar donde bescharde. O ischkolakero projekto „Roma ando Burgenland“ le ischkolaschendar taj ischkolaschkijendar la duj tschibtschengera maschkarutna ischkolatar Großwarasdorf presentirim ulo. Adaj on te pedar o bibasto terdschijipe, savo igen but burgenlanditike Roma ando nacijonalsocijalismus iste terdschivde, vakerde.
„O khetan ledschipe le sorendar, jek barikani koperacijona use mukel“
I Iris Zsótér, anglebeschaschkija le flogoskere grupnakere bajrotistar le burgenlanditike ungrikendar phenel, hot le keripeha le Forumistar4Burgenland angle trin berscha, jek centrali joma uso pomoschago le hajmatakere flogoskere grupnengere tschibtschendar, beschardi uli, taj adaleha, te o khetan butschalinipe le farajnenca taj la sikadipeskera direkcijonaha soraleder ulo. O khetan ledschipe adale sorendar, jek barikani koperacijona uso planinpe le bajder sikadipeskere diptschendar, uso keripe le siklipeskere materijalendar taj te uso keripe flogoskere grupengere schpecifischi projektendar, use mukel.
O Forum4Burgenland, taj te o cile dschene, bajder butschalina, hot o flogoskere grupnengere tshibtscha le arte generacijenge upre likerde on taj odola te vakerde on. I muschika uso mulatintschago „Burgenlanditike dschivipeskere themtscha“ ando kulturakero kongresiskero centrum Tikni Martona, i Leon Berger banda kertscha.