73 srastune-staklune-konstrukcijontscha upro opfertscha gondolinen
Ando maschkaripe le aprilistar le 73 anavengere prindscharde dschenenge gondolim ulo, save maschkar o 2to themeskero haburi, opfertscha le NS-reschimistar ule. Telal o ledschime taj murdarde dschuvla, murscha taj tschave, 69 dschene la flogoskera grupnatar le Romendar sina. Pradim ulo o gondolipeskero mulatintschago le birostar la gemajndejatar Großwarasdorf, Martin Karall.
73 strastune-staklune konstrukcijontscha upro talalinipeskero than ande Langental andar i phuv ari terdschdon. Sako jekoschno konstrukto jekeske terdschol, le anaveha prindscharde manuschenge, save andi nacijengeri cajt usar 1938 dschi 1945 murdarde ule. Le kinstleriske Peter Kedl barikano sina na tschak jek gondolipeskeri tablina upre te terdscharel, leske barikano sina jek than le talalinipestar te kerel taj le dschenen andar Langental ando planiniptscha leskera butjatar ande te phandel.
Josko Vlasich pro printschago ande likertscha
Le pensijonirti AHS meschteriske Josko Vlasich imar sajt pedar 20 berscha jek baro aunpaschlojipe hi, jek than le gondolipeske le but murdarde manuschenge ande leskeri hajmatakeri gemajnde Großwarasdorf te kerel. Ov te jek primintschago le logeriskere-prik dschivde Adolf Papaijiske dija, ande odoleskeri hajmatakeri gemajnde Langental jek gondolipeskero than te kerel.
Radijo „Roma sam“ | 2to maj 2022 | 20:50 orenge
Duach i sendung vodinel Susanne Horvath | Live Radio Burgenland
Jek le 73 dorongendar le opferenge le nacijonalsocijalismusitar ledschel o and pisinipe Matthias Papai. O dad le Adolf Papaijistar le nacijendar murdardo ulo. Saj barikanipe o gondolipeskero than, le ando bersch 2012 mule tschauiske ovlahi, dschanel o Emmerich Gärtner-Horvath, anglebeschaschi le flogoskere grupnakere bajrotistar le Romendar.
Ischkolaschtscha lila taj diveseskere kenvakere and pisiniptscha pisinde
O ischkolaschtscha la duj tschibtschakera maschkarutna ischkolatar ande Großwarasdorf intensivi la temaha „Roma ande amari gemajnde“ donde pumen bescharde. On lila taj diveseskere kenvakere and pisiniptscha andar o dikipe le NS-opferendar pisinde. I ischkolaschkija Olga Rupp phukal le tirinipestar le ande oja cajt 10-berschengere Adolf Papaijistar.
O terdschijiptscha le Adolf Papaijistar tschak jek falato odole tirinipestar hi, savo o manuscha maschkar i NS-cajt iste terdschivde. Vaschoda meg barikaneder hi, hot o terne adala temaha donde pumen bescharen, afka i ischkolakeri direkterkija la duj tschibtschakera maschkarutna ischkolatar Großwarasdorf, Elvira Heisinger.
Mindig buteder burgenlanditike gemajntscha akan adala barikane inicijativtscha bescharen, gondolipeskere thana le murdarde manuschenge maschkar o Porajmos keren taj o schitikne flatschki la phura cajtatar upre butschalinen. I thaneskeri rotkija taj falatoskeri vakeraschkija le flogoskere grupnendar, Elisabeth Trummer, upre sikal, saj barikano o historischi upre butschalinipe jeka khetana taj mirna cukunftake hi.