O Martin Selmayer taj o Paul Schmidt, generaliskero sekretari le austritike europitike politischi khetanipestar, te schunel kamnahi, sar i situacija le nacijonali tschulipendar hi taj so o aunpaschlojiptscha uso EU-jakere institucijontscha hi.
Ando 27to septemberi reste pumen fatretertscha le ando Burgenland dschivde flogoskere grupnendar andi KUGA ande Großwarasdorf, kaj o Roma duach o bajrotiskero anglebeschaschi, Emmerich Gärtner-Horvath, fatretim sina.
O dschene adale talalinipestar pumare etnischi grupn taj pumare farajntscha angle terdscharde. Sikatscha pe, hot o khetan butschalinipe maschkar o aun prindscharde flogoskere grupn igen latscho hi taj te andi lejcti cajt but khetane projekti prik bescharde ule. Te o khetan dschivipe le avre dschenenca ando Burgenland schaj ojs latscho akardo ol, butscholahi ando vakeripe.
Use EU-jakere temtscha o flogoskere grupnakere fatretertscha le schero le fatretinipestar la europitika komisijonatar, upri kompeksiteta le EU-jakere arpisinipeskere sistemostar, aun vakerde. Ando palvakeripe o Martin Selmayer phentscha, hot o aunrodipeskere- taj o projektiskere tschatschiptscha, afka sar ar ditschol, glajchi atschona. O EU-jakere ekspertscha te fatreterendar le thanestar Burgenland vodim ule, so le etnischi grupnenge o schajipe dija, o barikanipe le lokali pomoschagostar angle te asdel.
Upro kereko pedar i cukunft la EU-jatar
O Martin Selmayer maschkar pri trin diveseskeri tour lokali projekti te prindscharel siklino, fatretertschen mindenfelitike khetanipeskere grupnendar restscha taj te dschenenca andar i virtschoft taj andar i politik, poroti tschitscha.