O muschikaschi andar i Serbija, ando Burgenland jek nevi hajmat lakla. Adi hi ov privati muschikakero meschteri taj o instrumentscha saksofon taj schipojka sikal. Ov phenel, hot i muschika ando entviklinipe le tschavenge taj ternenge barikano hi.
Sajt 2009 o Leon aktivi ojs muschikakero meschteri butschalinel. Le but voja hi, te ov dikla, sar leskere ischkolaschtscha pumen mindig bajder entviklinen taj jeriniptscha uschtiden. I adi 17 berschengeri Victoria Eged imar sajt 10 berscha ischkolaschkija uso Leon hi taj use leste o instrumento schipojka siklini. I schipojkaschkija o duj tschibtschakero bundakero gimnasijum Erbate kher rodel. Oj na dschanel peske jek feder muschikakere meschteri angle te terdscharel taj tschak ando lek feder hangi pedar pro muschikakero mentori vakerel.
Ando 31to august 1979 o tikno Leon ando suditiko serbitiko Vranje upro them alo. O Leon khetan pre phraleha, pra dajaha taj pre dadeha ande jek tikno kher ande jek Romengeri sidlung upri rik le forostar Vranje dschivlahi. Kekaj leskeri daj taj leskero dad butschalinahi, i daj sabovkija taj o dad kelnerni sina, o Leon ando tschoripe upre bartschino. Imar sajt leskeri ischkolakeri cajt le adiveseskere muschikakere meschteri, vasch pri etnija, teldikipenca taj diskriminacijaha te kejmpfinel sina.
Radijo „Roma sam“ | 23ti august 2021 | 20:50 orenge
Duach i sendung vodinel Susanne Horvath | Live Radio Burgenland
Kekaj phariptscha dija, schofintscha le o Leon but butschalinipeha taj pomoschagoha leskera dajatar taj leskere dadestar, andi Serbija i flogoskeri ischkola kher te rodel taj paloda o muschikakero gimnasijum le forostar Leskovac te kisetinel. Ando kisetinipe le enjavardeschte berschendar iste ov pra familijaha akor vasch o haburi upro Balkan andi Austrija naschi gelo.
O Leon na vakerel meresch pedar o tirinipeskero drom, savo ov taj leskeri familija iste terdschivtscha, dschimeg on le schofinde, andi Austrija te migririnel. Andi Austrija aun alo, ov taj leskeri familija andi burgenlanditiki gemajnde Telunti Erba pumaro than lakle. Odoj leskero erschti kontakto use flogoskere grupnakere dschene sina, duach save ov te mindig feder kontakto uso avre dschene uschtidija, kaj paloda akor i muschikakeri utschi ischkola schaj kisetintscha.
Romengeri muschika le Leon Berger sako di vodinel. Le te but idoltscha andi internacijonali muschikakeri scena hi. Leskeri identiteta ojs flogoskero grupnakero dscheno na te garul taj barikanipeha te ledschel, leske ande leskero dschivipe igen barikano hi. Na dur pal, ov pri ajgeni Romengeri kombo kertscha, savi o anav Leon Berger Band ledschel. Le manuschenge o mindenfelitiko la internacijonali Romengera muschikatar pasche te anel, adaj andi erschti rik terdschol.
Sajt valami trin berscha butschalinel o muschikakero meschteri te usi poschta ojs subotonakero bitschajipeskero use terdscharaschi. Ada kerel ov, kaj pra familijake financijeli telal i angali schaj astarel. O Leon sajt 20 berscha bastalo la burgenlanditika Romnijaha Melanie Berger sohardo hi. Khetan dschin on pumare duj tschajenca ando suditiko burgenlanditiko gav Ciklina. Leskeri familija o lek barikaneder ande leskero dschivipe hi.