Siklipeskero pomoschago ando Lockdown

Uso kesdipe o pomoschago le tschavenge andi erschti rik terdscholahi, kekaj o ischkoli use tschapim hi, phukal o Emmerich Gärtner-Horvath, anglebeschto le farajnistar Roma-Service. Adaj o farajn pre meschterenca Susanna Gärtner-Horvath taj Josef Schmidt mindig ando kontakto le pedagogkijenca taj pedagogenca terdschon, kaj pedar o siklipeskere plantscha taj o pomoschagoskere koji le jekoschne tschavendar, vakeren. O meschtertscha taj meschterkiji taj te o daja taj dada lenge palikeren, kaj on lengere tschavenge ando Homeschooling telal o va astaren, afka o Emmerich Gärtner-Horvath.

Ando khera le farajnistar Roma-Service, akan butvar o ischkolaschtscha andar i flogoskeri ischkola hi, taj odolenge pomoschim ol. Phureder ischkolaschtscha la uprutna schtufnatar, saven butvar online sikajipe hi, butvar digitali pomoschinipe uschtiden.

O siklipeskero pomoschago le ischkolaschenge andar i flogoskeri ischkola, akan angloplane hi, avrija sar te sa normali naschlo. Ando siklipeskere ori o khereskere- taj o ischkolakere butja le tschavenca kerde on – sa ando telvakeripe lengere meschterenca taj meschterkijenca, save le ischkolaschenge phenen, hot uso pomoschagoskero siklipe le farajnistar Roma-Service te dschan. Avrijal hi akan te i anglutni buti: O cile khera taj stoli iste butvar ando di desinfircirim taj schuscharde on, kaj o angle dime koji, and likerde te on, phenel o Gärtner-Horvath.

Jek baro problemo, so le tschaven ando Lockdown hi, hi hot korkore hi le. O socijali kontaktscha falinen, save o lek buteder tschave andi ischkola, dschin. Te o umgejipe le nasvalipeha Corona taj i dar, savi kerdi ol, le tschavenge pharo perel taj lendar igen but manglo ol. Jek mangipe le tschavenge ham te le dajenge taj dadenge, save butvar le Homeschoolingiha, le ajgeni butjaha taj la eksistencakera daraha, savi i pandemija peha antscha, na um te dschal dschanen, afka o Gärtner-Horvath. Te o meschteri Josef Schmidt, savo but le tschavengere brigendar esbe lel, i situacija afka dikel.

I daj schtar tschavendar, Cindy Pereira da Silva, pedar o mangiptscha phukal, te o ischkoli use tschapim hi taj o tschave ando Homeschooling hi. I situacija le cilenge phari hi, phukal oj – taj vaschoda meg barikaneder hi o siklipeskero pomoschago le farajnistar Roma-Service. Upri jek rik le dajenge taj dadenge pomoschim ol, upri avri rik le tschavenge jek socijali kontakto dim ol, kaj on avre tschaven, kekaj o terdschojipe and likerdo iste ol taj te loafnini ledschim iste on, schaj resen.

Akan o siklipeskero pomoschago o falato la ischkolatar ande lija – kaj ando paloplaneskero siklipeskero pomoschago meg te kheldo ulo, akan vaschoda dschal, o butja tel te butschalinel, kaj o tschave pumare upre dimi khereskere butja na korkore khere iste keren. O tschave ada keripe le siklipeskere pomoschagostar hajon taj esbe len, hot pomoschim lenge ol – afka o Emmerich Gärtner-Horvath.

O ischkolaschi andi flogoskeri ischkola, Justin Raphael Sarközi, mindig ando siklipeskero pomoschago al taj leske te latsche tecinel. O Lockdown, sar ov phenel, na tecinel leske asaj latscho taj te la temake ischkola, keverime esbe liptschenca, gejng lo terdschol, ham ov pe imar igen upre pre pajtaschtscha loschanel.

Ando Lockdown o cilo diveseskero siklipeskero pomoschago upre likerdo ol. Te o ischkoli akor papal upre tschapinde, o siklipeskero pomoschago papal sar agun, paloplane, hi.