O Stephan Steinwidder hi jek keraschi le „Kältetelefons“ istar Gereciste, jek inicijativa, kaj o dschene save aun harangosinen, save dikaschtscha dschenendar hi, save avral ando schil iste dschin taj retim on. Sajt pedar jek bersch vodinel ov o VinziNest andi Kernstockgasse 14 taj ov o dscheno hi palo legenderi August „Gustl“ Eisner. Oda o sojipeskero than le tschore dschenenge ando bersch 1992 khetan le raschajiha Wolfgang Pucher andar i „Vinzenzgemeinschaft“ kertscha.
Ande oda sojipeskero than leskere dschene pomoschinen migrantengere murschenge, save tschore hi taj than len nan kaj schaj son.
„Ande amaro kher murscha an andar valami 26 nacijontscha. But lendar Roma hi andar i Slovakija vaj Rumenija. Amaro lek terneder 18 berscha hi taj o lek phureder 85“, phenel o Steinwidder. Avrijal sar sunst o kher aktujeli le dschenenge mindig phrado hi. Mint manuscha nisaj atschipeskere thaneha ande adala cajtscha argejipeskere beschrejnkinipeha lenge igen pharo hi.
Coronajakero koncepto funkcijonirinel
„Ma khetan dschanen o va desinficirinen", terdschol upre poar tablini ando ande gejipeskero than le VinziNestsistar. Pasche i nimtschki versijona te ande but avre tschibtscha ada pisimo te genel hi.