Ando dschivipe vrischtschanta „Dream Road – Danube Region for improved Access and Empowerment of Roma Developement“ i slovenitiki organisacija RIS, sava imar dschanipe ando prikbescharipe EU-akere projektendar hi. Aja organisacija ando keripe le kojastar „Danube Transnational Programme“ urpo rodipe pal partnertscha, save ando Donauakere vilagi dschin, kertscha pe kaj khetan strategiji uso feder keripe le dschivipeskere situacijendar le Romendar arbutschalim taj prik bescharde te on. I Roma VHS Burgenland le inicijatoristar andar i Slovenija akardi uli uso projekto mit te kerel, kaj 29 institucijontscha taj organisaciji andar 10 vilagi khetan ando feder keripe le dschivipeskere situacijendar le Romeendar butschalinen, afka o Lehner.
I socijali situacija le Romendar ando ostitike vilagi la Europatar butvar bibastali hi. On meg mindig la diskriminacijatar taj le stigmatisirinipestar resle hi. Adala vilagi, kaj o Roma ande bibastali situaciji dschin, te falato le projektostar hi, savo pomoschago la EU-atar uschtidel. O Roma taj lengere tschatschiptscha iste odoj meg soraleder on taj vaschoda barikano hi, hot vilagi sar o Ungriko ande anda projekto ande phandle hi. Mint odoj sajt poar berscha jek terno micinipe aktivistendar del, save pumen le tschatschipenge le Romendar ande bescharen – taj asaj koja schaj amen le projektoske „Dream Road“ pomoschinas.
Radijo „Roma sam“ | 23ti novemberi 2020 | 20:50
Live Radio Burgenland
Upre butschalinipe taj gondoskero soralipe o scheroskere butja hi
Andi Austrija o teldikiptscha, save meg mindig gejng o Roma telal o avre dschene del, tel baunim te on. Vaschoda afka akarde multiplikatortscha arsikade te on. Feder phendo, manuscha, saven interesi le projektoske hi, arsiklim te on, sar sterejotiptschenca o umgejipe hi taj sar odola tel baunim schaj on. Odo ando than le medijendar schaj ol. Mindig o Roma ando mediji ande phure falati sikade on; upri jek rik ojs kuduschtscha vaj ojs tschora. Gejng adala sikaviptscha iste valaso kerdo ol.
Jek avri butjakeri mesuja schaj o ischkoli on. Te le tschavenge sikado ulo, sar on o teldikiptscha te prindscharel te siklon taj odola te dekonstrujirinel dschanen, akor na ledschna odola len ando pradipe. Adaj vasch upre butschalinipe taj gondoskero soralipe dschal taj ada metodakero entviklinipe akan ar butschalim ol, phenel o Lehner.
Andi Austrija imar poar barikane projekti dija, save uso upre butschalinipe taj uso telbauninipe le teldikiptschendar use ledschine. Jek leske hi o projekto Roma2000. Sar amen andi sendung Roma sam phukatscham, i datakeri banka andi arti cajt aktujalisirim ol. Jek avro projekto le Lehneriske o projekto Romane Thana sina, savo le betschitike Romengere farajnistar Romano Centro inicirim ulo. Ada artschijipe phukatscha o tschatschikane dschivipeskere situaciji le Romendar andi Austrija upre jek autentischi sikavipe taj te upre sikal, saj absurdi but teldschikiptscha hi. „I cajt ali, adala sterejotiptscha andar o rajipe le pamaristschendar taj historijendar ari te tradel – o kipi pedar o Roma le rejalistischi kipenge aun pasim te on“, afka o Lehner. Le teldikiptschen meg mindig igen baro and fojinipe upri dschivipeskeri situacija le Romendar hi.
Gondolinipe upre jek feder keripe la cukunftake
Jek le lek feder prindscharde projektendar ando EU-jakero than sina o afka akarde „Strategiji usi inklusijona le Romendar dschi 2020“. O Andreas Lehner adale projektoske eknaj kritischi gejng terdschol, vaschoda, kaj dschjakana meg nisaj evalujirinipe pedar o jeriniptscha taj o feder keriptscha la cukunftake adale strategijendar del. Kekaj afka hi, i buti la europitika unijonatar hi, i dschivipeskeri situacija le Romendar feder te kerel.
O gondolinipe akan baro hi, hot le projektoha „Dream Road“ taj le keripeha le europitike schtotendar, save adaj use hi, iriniptscha taj feder keriptscha andi cukunft jerinde schaj on. O projekto meg dschi uso 31ti decemberi 2022 naschel.