On demand | Roma sam | 31.8.2020
But desch eseri manuscha use jek protestoskero phiripe ando amerikanischi scheroskero foro Washington gejng rasismus taj harengero maripe gejng kale manusche demonstririnde. O demonstrantscha paraschtujate anglo Lincoln Mermorial resle pumen. Odoj, kaj angle 57 berscha o polgarengero tschatschipeskero kejmpferi Martin Luther King pro prindschardo vakeripe „I Have a Dream | Man jek suno hi“ likertscha.
„Black Lives Matter | O dschivipe le kale manuschendar genel“
O them thabol, na al ando mirnipe taj na tschak vasch i Corona pandemija. O kejmpfinipe gejng o harengero maripe taj o rasismus andi Amerika utsche veltscha tschalal, o themeskere idoltscha la vekakera lobdakera ligatar andi Amerika a.s. andi NBA, upral o khelipeskere thana pal pumen ciden, solidarisirinen pumen le dschenenca, save protestirinen. O kheliptscha tel phende ule.
O phiripe ando amerikanischi bundakero scheroskero foro paraschtujate palo mulipe le afroamerikanischi dschenostar George Floyd use jek bibastalo harengeroskero tradipe ande Minneapolis ando kisetinipe le majistar organisirim ulo, ojs datum o 57 berscheskero di le King-vakeripestar ar rodim ulo. Jek parno harengero le Floydiske dureder sar ofto minuti pri tschang upri men dschumintscha, dschimeg o 46 berschengero pro ileto naschatscha. O bibastalo murdaripe le familijakere dadestar protestscha gejng rasismus taj harengero maripe ando cilo than ar putrintscha. O Floyd use jek simbolakeri figura le micinipestar „Black Lives Matter | O dschivipe le kale manuschendar genel“ ulo.
Vakeraschi le UNOskere-manuschengere tschatschipeskere birovtschagostar | „Bibastalo maripe“
O UNOskero-manuschengero tschatschipeskero birovtschago ande Genf gejng o harengero maripe gejng jek avro kalo amerikaneri, nischaj puschka nana, ande Kenosha ando US-schtot Wisconsin ar pe vakertscha. Jek harengero le Jacob Blake lejcti kurko eftavar andar o paschipe ando dumo kartschi dija, kada ov ando verda ande uschtino, kaj leskere trin tikne tschave beschnahi. O mursch akan nan dschanel buter te dschak, phenel leskeri familija. O harengere, so upro videjo te dikel hi, „bibastalo maripe“ kerde, phenel o vakeraschi le UNOskere manuschengere tschatschipeskere birovtschagostar Rupert Colville paraschtujate ande Genf.
Situacija andi Amerika eskalirinel
Uso tel likerde protestscha pal ada murdaripe, keden duj manuscha murdarde ule, kada but schel demonstrantscha vasch o harengerenge kartschidiptscha upro 29 berschengero afroamerikaneri Jacob Blake upro poschtito gele. Jek 17 berschengero parno amerikaneri ojs mulipeskero kartschidijaschi astardo ulo. Parne rasistischi grupn puschkenca del, save le demonstrantenge maripeha pal te vakerel kamna. I situacija andi Amerika eskalirinel.
Igen utscho upre uschtschavipe le Coronakere-infekcijonendar upro cilo them
Andi cajt le protestschendar taj le murdaripeskere maripestar gejng kale manuscha, registririnel o them jek utscho upre uschtschavipe le dschenendar, saven Corona hi. Le but roasinipeskere naphandlipe taj o upre asdime kojen, akan konsekventscha hi. I sastipeskeri themeskeri organisacija WHO suboton jek igen utscho upre uschtschavipe le Coronakere-infekcijonendar upro cilo them ari dija: 259.648 neve nasvaliptscha ando lejcti 24 ori registririm ule.
O Ungriko taha papal pre granici use tschapinel. 32 vilagi, tel lendar but sud-ost europitike vilagi sar o Horvacko, ojs risikoskere vilagi genen. Dschene save andar odola vilagi an, iste usi granci andi Austrija jek negativi Covidiskero test angle paschlaren. O test iste peske sako potschinel. Tschak poar koji del, kaj o test potschindo ol. O sastipeskero ministerijum mindig odola koji, kaj o test na potschindo iste ol, aktujalisirinel.
Andi Austrija papal o ledschipe la loaflinatar al. Ando barikane thana sar boti, uso badartscha, schpiti taj ando pradime fakeriskere koji, imat akan o loaflini iste ledschim on. Sar o ischkoli organisirm on, prado atschol. Jek normali ischkolakero naschipe o kivanipe la regirungatar hi.
Imar ando jeneri jek impfinipe andi Austrija
O aktujeli igen utscho upre uschtavipe le infekcijonendar sikal, so ando terno linaj andi Austrija te uscharel hi. Jek afka akardi dujti vela upre te likerl hi. Sar, oda sikan o divesa, save akan an. Vaschoda schaj pumenge phare gondi kerde on. O virus nan bejg. O manuscha siklovna, leha te dschil. Barikano hi, hot jek medikamento, savo pomoschinel, laklo ol. „Schaj ovlahi, hot imar ando jeneri jek impfinipe andi Austrija del.“ Uso berscheskero irinipe schaj 600.000 impfinipeskere bikslini le 300.000 manuschenge prik dim on. Rudolf Anschober: „Akan igen latsche ar ditschol.“ Ham upro use pheniptscha le pharmakere firmendar taj o foroskere use mukiptscha iste mek tel uschardo ol.
Adaleske ham cajt pekal. Hat: Obocht iste dim ol, upro tschatschiptscha iste diklo ol. Duraripe and te likerel taj te desinficirinel.
Neve gondolipeskere thana | Uprutni Pulja taj Pinkafa
Ando gaveskero centrum andi Uprutni Pulja jek gondolipeskeri tablina le opferenge la NS-diktaturatar, tel utschuardo ol. Jek kipo jeka Romnengera tschajatar ande Łódź, o koja hi, kaj aja gondolipeskeri tablina kerdi ol. Ando murdaripeskero logeri Kulmhof ande Łódź, te ojs murdaripeskero logeri Chełmno prindschardo, andi NS-cajt 5.007 austritike Roma murdarde ule. O lek buteder, andar o Burgenland sina. Buteder sar o epasch, tschave taj tschaja sina. Telal i tablina jek seletoskero forma le momeltschenge kerdi ol.
Tel utscharipe la gondolipeskera tablinatar andi Uprutni Pulja subota, 19to septemberi 2020, 14:00 orenge – anglo becirkiskero scheroskero birovtschago, scheroskero poschtito 56
Keripe jeke gondolipeskere thanestar le NS-opferenge
Te o gemajndakero rot Pinkafate imar 2018 le keripeske jeke gondolipeskere thanestar le NS-oferenge ar pe vakertscha. O museumiskero farajn Pinkafa o rescherschtscha uso opfertscha kerde. O gondolipeskero than le burgenlanditike kinstleristar Dr. Gottfried Reszner kerdo ulo taj upro 33 dschene Pinkafatar pal gondolinel, save telal o NS-reschim murdarde ule. Telal o opfertscha hi murdarde viderschtaundskejmpfertscha, „tradime“ dschidovtscha, opfertscha la „NS-tschavengera eutanasijatar“ taj le NS-eutanasijakere keripestar „Akcijona T4“ taj te jek Romni. Taj jeke pisinipeha te upro buteder sar 1.000 Romnija taj Roma gondolim ol, save ando oktoberi 1941 andar o aguno than Erba la srastunaha andar Pinkafa ando ghetos le murdaripeskere logerendar ledschim ule, kaj o cile andi bok vaj tifus mule vaj fagasim ule.
Tel utscharipe le gondolipeskere thanestar ande Pinkafa
kurke, 6to septemberi 2020, 15:00 orenge – „Than le palgondolipestar“ gemajndakero khereskero than Pinkafa