O Ludwig Horvath ando 23ti merc 1955 ojs jek le efta tschavendar le soharde dschenendar Horvath, Erbate upro them alo. Upre bartschinno ov andi afka akardi dujti Romengeri-sidlung, savi ando kesdipe le 1970te berschendar, vasch o bauninipe la neva schpitatar, upro aguno than la nojoskera deponijatar, kerdi uli.
1975 o Ludwig Horvath pra dschuvla te prindscharel siklino taj so duj ando Ungriko use lakeri familija cidine. Ov afka uso jek le tschule austritike kherodaschengere butschaschendar ando komunistischi vilago ulo. Kekaj pharo sina, i nevi hajmat ojs bast le terne dschenenge pe sikatscha. O Ludwig Horvath i ungriki tschib siklino taj jek arsiklipe ojs forstiskero butschaschi, kisetintscha.
Ando kesdipe le 80te berschendar o Ludwig Horvath pra familijaha papal andi Austrija pal alo taj buti upro poschtitoskero bauninipe aun lija taj mindig, afka sar but avre burgenlanditike murscha, Betschiste ladlahi. Andi pensijona, o Ludwig Horvath, mindig le tschatschipenge taj jeka feder cukunftake la flogoskera grupnake le Romendar, ando mindenfelitike Romengere-organisaciji, butschalinlahi.
I tschib le Romendar, o Burgenland-Romani, leske jek centrali bauninipeskero bar la etnischi identitetatar sina. Leskero lek bareder kivanipe sina, hot o Roma taj o gadsche „mirne khetan te dschin“. O Ludwig „Burli“ Horvath 65 berscha phurano ulo.