But receptscha del, sar lole scha kerde schaj on. But dschene lole scha oni mas prindscharen. Uso Roma o mas khetan la schaha thado ol. Taj adaj diken, saj koji tumenge use pekan taj sar o lole scha thade iste on.
So tumenge use pekal:
1 schero scha
1 kg balano paschavrengero mas
kuschle paradajs
seleni paprika
1 kg bangore
sir
kermago
cilo papro
lon
lorberiskere patra
elo
jaro
paradajsengero moak
schut
Butschalinen afka
1. O scha te hoblinel taj o balano paschavrengero mas ande kocki te tschinel. Ande jek piri 2 bare roja elo ande te tschil taj te jagarel. Paloda i sir te tschinel, andi piri te tschil taj asaj dur te thal, dschimeg somnakuno feschto uschtidel. O tschindo balano paschavrengero mas use te del taj asaj dur te thal te mukel, dschimig o mas epasch kovlo hi. Akan i paprika ande schtrajfn te tschinel.
2. Te o mas epasch kovlo hi, o scha taj i paprika use te del. Le lorberiskere patrenca, le kermagoha, le cile paproha taj le loniha sa te vircinel. Pedar o cile koji valami ½ literi paj pedar te tschorel taj la duga rojaha latsche duach te keverinel.
3. Akan o cile koji te thal te mukel, dschimeg o scha epasch kovle hi. Akor le rantaschiha te kesdinel. Use valami 2 bare roja elo ande jek schorpojnja te del taj te jagarel. Akan 3 – 4 bare roja jaro use te del taj la duga rojaha te keverinel, dschimeg o rantaschi jek somnakuno feschto uschtidel. Paloda o paradajsengero moak ue te del taj papal latsche duach te keverinel.
4. Akan o kuschle paradajs telal o scha te asdel. O glajchi keres le rantaschiha. Sa latsche duach te keverinel taj valami jek ½ ora meg te thal te mukel. Paloda meg jek tschepo schut use iste des.
5. Paj taj o bangore ande jek piri te del taj te thal te mukel, dschimeg o bangore kovle hi. Paloda elo ande jek piri te del taj te jagarel. Akan i tschindi sir ande te del taj asaj dur te thal, dschimeg somnakuno feschto uschtidel. O kuschle bangore ande te del taj cam te dschuminel. O bangorengero restinipe latsche duach te keverinel taj loniha tel te islinel.
Amen akan tschak but voja uso keripe tumenge schaj kivaninas taj latscho habe!