Roma sam | 6.4.2020 | 20:50 orenge
Radijo Burgenland | Live
I Romni Tina Friedreich andar o nord la Slovenijatar al, pasche o gav Murska Sobota. Ando Romengero-dschivipeskero than, na dur pasche i schtacki granica, pre erschti dschivipeskere berscha terdschivtscha. Oj imar ando terne berscha, sorale la flogoskera grunakera tematikaha, donde pe bescharlahi.
La Tina Friedreich dschi adi le manuschenca odoj igen vusko khetan phandli hi. I 1987 upro them ali Romungri upri universiteta ande Ljubljana nimtschko taj rustitko schtudirintscha. Pal pro schtudijum andi Austrija geli taj odoj akan ando projekto „Kambuke | Arbeitsmarktintegration für Roma und Romnia“ butschalinel.
I aktivistkija Tina Friedreich pedar i irimi, aktujeli situacija upro butjakero foro taj pedar o virtschoftlichi naschajiptscha, save i Corona pandemija te la flogoskera grupnake le Romendar anel, vakerel.
Sikadipe, maripe, nisaj buti taj diskriminacija meg mindig bare barijertscha la khetana participacijonake hi. I trenerkija taj prik beschaschkija Tina Friedreich imar dur adale kojenca donde pe bescharel taj oj pedar pre esbe liptscha taj terdschijiptscha, phukal.
O Internacionali Romengero-Di ando parlamento tel phendo hi
Te o mulatintschage le betschitike kulturakere farajnistar le austritike Romendar, vasch i Corona krisa tel phende ule. Planim sina jek khetano mulatintschago le parlamentoskere presidentiha Wolfgang Sobotka taj le Romengere aktivistenca/aktivistkijenca ando parlamento. Ada phentscha o Andreas Sarközi, botakero schero le kulturakere farajnistar, ando vakeripe le Samuel Mágóha.
Afka te o gondolipeskero mulatintschago ande Salzburg ando 17to april upro oktoberi ispidim ulo. Taj akan te afka ar ditschol, hot o gondolipeskero mulatintschago uso 75to berscheskero di le putripestar le logeristar Mauthausen, ando 10to maj 2020, tel likerdo schaj ol, ham oda akor tschak jek tikno keripe ovla, phenel o Sarközi pal o ande schecinipe la situacijatar.