O rasistischi gondo butvar le sterejotipschenca khetan khudim hi. Erschti sterejotiptscha imar andi ischkola siklojas, ande amare ischkolakere kenvi. I Riem Spielhaus profesorkija la islamakera visenschoftake upri universiteta Göttingen hi. Pasche hi li te o schero le keripestar „Dschanipe ando prik phageripe“ le „Georg-Eckert-instutistar" le internacijonali ischkolakere kenvengere forschinipestar“.
Oj aun peske dikla, sar o Roma ando europitike ischkolakere kenvi sikade on. On o lek bareder europitiko tschulipe hi. Valami 10 dschi 12 milijoni Roma, afka o schecinipe le europitike rotistar, andi Europa dschin. Ham ando ischkolakere kenvi tschak igen tschule angle an.
Ando historijakere-, politikakere- taj socijali kundejakere kenvi ande 21 europitike vilagi o Roma tschak valami 800var akarde on.
O demografischi datscha taj lengero tradipe andi cajt le nacijonalsocijalismusistar adaj andi erschti rik terdschol. Pedar o jekoschne dschene le anaveha taj pedar o individujeli dschivipeskere naschipe, o ischkolaschtscha taj ischkolaschkiji, ham nischta na sikon, phenel i Riem Spielhaus.