O Baumgartner sikal jek historischi ande dikipe ando dschivipe le Romendar ando burgenlanditike sidlungen ando kesdipe le 20. schelberschengerostar, lek feder le 1930iger berschendar, kaj o Roma vaschi virtschoftakeri krisa usi maripekskeri grupn ule taj le nacijonalsocijalistendar ledschim, taj le Porajmosiske opfertscha ule, phukal o Baumgartner.
Valami 140 Roma sidlungen ando Burgenland delahi, savendar tschak tschule prik atschine. I lek bareder sidlung ande Holzschlag sina, ando becirk Erba, kaj pedar 300 Roma dschivnahi. O centro sina Lafnitztal, suditikon Deutsch Kaltenbrunnistar dschi usi ungriki granica. Odoj buteder sidlungen delahi, kaj valami pedar schel Roma dschivnahi. Korkor ande Deutsch Kaltenbrunn dschivnahi valami 160-170 Roma, phukal o Gerhard Baumgartner.
O lek buteder sidlungen palo ledschipe le Romendar le gadschendar andar o gava pujste tschite ule. Ojs erschti le murschen resla, save ojs mujsinipeskere butjaschtscha, lek buteder upro dromeskero bauninipe ande bescharde ule. Harnon paloda le dschuvlen ledschine, lek buteder odolen save imar buti te kerel dschanahi, odolen ando logeri Ravensbrück ledschine phenel o historikeri use.
Bajder phukal o historikeri Baumgartner la bara deportacijonatar ando bersch 1941. Baro falato le manuschendar andar o Burgenland alo.