„Ceija Stojka – This Has Happened“
Gilda Nancy Horvath „Roma sam“ Hetvin, 9.3.2020, 20:50 orenge upre Radio Burgenland
Telal o anav „Ceija Stojka – This Has Happened" sikal o musejum „Reina Sofia“ ande Madrid o aktujeli artschijipe verkendar la holocaust prikdschivdendar. I Gilda Nancy Horvath harnon la kinstlerkijatar o artschijipe andi Espanija kherodija. O verktscha pasche le Pablo Picassojistar taj Salvador Dalíatar te dikel, igen barikano hi. I Ceija Stojka terdscharel jek la lek soraleder Romengere dschuvlendar andar i Austrija taj jek barikano kipo la adiveskara khetanipeske kerel, phenel i Horvath.
O adiveseskero polgarengero micinipe le Romendar andi Europa dschi adi la butjatar la progresivi dschuvlatar Ceija Stojka ledschim ol. Ande but organisaciji le Romendar o dschuvla andar i „Community“ scheroskere posicijontscha ande len taj i agenda le flogoskera grupnatar sorale preginen, phenel i aktivistkija.
Barikani naschipeskeri cajt Romblog.at
2017 kertscha i Gilda Nancy Horvath i internetakeri platforma Romblog.at. Palo ar le projektistar cidel i journalistkija taj Roma aktivistkija bilanc taj phukal pedar i cukunft la medijakera platformatar.
O projekto „Romblog Digital Evolution“ o cil hi, o schajipe terne manuschendar, lek feder terne Romenge, upro butjakero foro duach o medijakeri sikadipe te anel. I Horvath upre jek barikani cajt pal dikel, ande save but terne manuscha jek upre asdipe andi medijakeri buti schaj facajchninde.
Ande jek nevi koperacija le „European Roma Institute for Arts and Culture“, harnon pisim „ERIAC“ le beschipeha ande Berlin, taj internacijonali Romane medijakere fatretertscha jek nevo team andi platforma Romblog.at upre baunim te ol. Te andi cukunft terne medijakere interesirti dschenenge pomoschim te ol. O fokus upri Romani tschib upre likerdo te ol, phenel i journalistkija Horvath.