Dromeskere vodaschtscha la Romengera Flogoskera Utscha Ischkolatar jeke pativiskere lileha „Romano Kham“ patijarde ule.
Angle 30 berscha o micinipe le austritike Romendar ando suditiko Burgenland pro kesdipe lija. Ando juli 1989 o erschti Roma farajn andi Austrija Erbate kerdo ulo, le ciliha i situacija la flogoskera grupnatar feder e kerel taj o teldikiptscha tel te bauninel. Odoleha jek barikani joma le aunprindscharipeske ojs flogoskeri grupn paschlardo ulo. Desch berscha palo farajniskero keripe i flogoskeri utschi ischkola ando dschivipe vrischtschando ulo.
Adala duj jubilejumtscha o lejcti kurko Erbate ando OHO mulatinde ule. Jek dikipe pedar o 30 berscha Romengero micinipe del o artschijipe le farajnengere cajtungendar.
Artschijipe le farajnengere cajtungendar
Jek jubilejum latscho cajtiskero punkto hi, kaj asaj koja schaj sikado ol, phenel o artschijipeskero keraschi Erich Schneller. Ada latscho upro falo te dikel hi, kaj o cajtungen, sar i Romani Patrin vaj Romano Kipo, artschito ulo. „Adaj le dschenen papal dikes, save prindscharde hi“, phenel o Schneller. Te o Emmerich Gärtner-Horvath usar o kesdipe use sina taj palgondolinel upro keripe la Romengera Flogoskera Utscha Ischkolatar angle 20 berscha. „ Me mindschar loschando somahi, kada ada gondo alo jek flogoskeri utschi ischkola le burgenlanditike Romenge te kerel“, phenel o Emmerich Gärtner-Horvath.
Uso mulatintschago le dromeskere vodaschenge la Romengera Flogoskera Utscha Ischkolatar o pativiskero lil „Romano Kham“ ojs barikano aunprindscharipe otscha dim ulo. Telende te o socijolingujist Dieter Halwachs, savo but uso telpisinipe la burgenlanditika Romana tschibtschatar kertscha. „Ada o erschti pativiskero lil hi, savo me aunlijom“, phenel o Halwachs. „Aja buti barikani sina mange uso kesdipe taj oja ovla mange mindig barkane me man mindig le burgenlandiha phandla“, phenel o Halwachs.
Cil la Romengera Flogoskera Utscha Ischkolatar hi ando 20 berscha save avna i tradicija taj kultura le Romendar le pradipeske bajder te sikal.