Ando 4. feberi 1995 jek bibastalo rasistischi atentato andi dujti republika kerdo ulo: Schtar dschene la flogoskera grupnatar le Romendar o Josef Simon, o Peter Sarközi, o Karl taj o Erwin Horvath duach jek bomba murdarde ule. Upri bomba jek tablina sina le upre pisinipeha „Roma zurück nach Indien“. Uso probalinipe, i tablina bejg te lel, i bomba eksplodirintscha. Ada atentato jek falato rasistischi motivirti serijatar sina, savo la Austrija andar 1993 dschi 1997 andi dar tschitscha.
Ar la pantsch berschengera smiromjakera taj konsensujali politikatar
„O atentato markirinel o ar la pantsch berschengera smiromjakera politikatar andi Austrija taj jek papal upre uschtschajipe jeke murdaripeskere, rasistischi rechtsekstremismusjistar. O Erwin Horvath, Karl Horvath, Peter Sarközi taj o Josef Simon opfertscha sina jeka rechtsekstremi idejologijatar, savi pe gejng o tschuliptscha ando ajgeni vilago taj gejng ande phiraschengere dschene dschal“, phenel o Gerhard Baumgartner, journalist, historikeri taj visenschoftlichi schero andar o „Dokumentationsarchiv des österreichischen Widerstandes (DÖW)“, uso gondolipeskero mulatintschago ando feberi 2020
Baninipe pedar le gondolipeskere terministar
Barikano i buti andar i Romapastoral hi, kaj i palgondolipeskeri kultura use genel. I Manuela Horvath, sajt 2016 o schero la abtajlungatar, igen baninel, kaj vaschi aktujeli corona pandemija, meg termin na del le gondolipeskere mulatintschagoske, savo ando kesdipe le feberistar mindig tel likerdo ol. „Te 26 berscha palo ada bibastalo atentato o gondolipe pekamlo ol taj gejng o rasismus taj tradipe ande amaro khetanipe upre pe te asdel“ phenel oj.