Phurtakere keraschtscha le kulturendar

Ando lejcti berscha vascho nevo flogoskero grupnengero tschatschipe tschule pe kertscha, phenen o fartretertscha le schov flogoskere grupnendar andar i Austrija use i adivesakeri presejakeri konferenc. On mangen, hot o flogoskere grupnengere loj dujvar, sar akan le hi, asdim te on.

Nisaj micinipe uso nevo tschatschipe

I bilanc la upre phuterdi regirungatar igen sane ar perel. Uso nevo tschatschipe le flogoskere grupnenge igen tschule pe micintscha. „Te le tschatschikan barikane te lel kameha le mindenfelitikoha, akor iste te o tschatschiptscha use keres“, phenel o Martin Ivancsics, savo le burgenlanditike horvacken fartretinel. Na tschak schukar alava le parlamentiskere klubendar pekan , te keriptscha latsche ovlahi.

O Bernard Sadovnik, fartreteri le „Kärtner“ slovenitikendar, mangel, kaj o presejakero pomoschagoskere loj, o tschatschipe use, neve novelirim te ol. Afka schaj o papruschengere neviptscha le autochtoni flogoskere grupnenge bajder kerde on. „Te o alav na buter vakerdo taj pisim ulo, akor le flogoskere grupn na buter del“, phenel o Sadovnik.

Te o pomoschagoskere loj „dujvar asdim“ te on, phenel o Sadovnik. O subventcijontscha akan 3,6 milijontscha Euro ando bersch hi. O dujtschibtschengere flogoskere grupn ojs „phurtakere keraschtscha le kulturendar hi“ taj te barikano virtschoftlichi faktor, phenel i Ingrid Konrad, fartreterkija le Slovakendar.

Buteder khetan butschalinipe

O Roma fartreteri Andreas Sarközi ari asdel, saj barikano o khetano khetan butschalinipe le flogoskere grupnendar hi. Latscho ovlahi te buteder palal phutschlo ovlahi pedar o autochtoni grupn, sar lenge dschal so lenge pekamlo ol. Use adala genen o burgenlanditike horvacke, slovenitike, tschechitike, slovakitike, ungrike taj Roma.