Gondolipe Barankapark | Jek hango la austrijakere mindenfelitikoske
On demand | Roma sam | 29.5.2017
Imar poar berscha vakerel o dschidovtschengero pisimaschi taj historikeri Doron Rabinovici uso gondolipeskero mulatintschago ando Barankapark. Leske barikano hi, pe ojs dschido solidarisch te sikal, kaj le Romen, Sinti, taj dschidovtschtschen jek khetani tradipeskeri historija ulan.
Ada gondolipeskero mulatintschago jek hango la austrijakere mindenfelitikoske hi, phenel o Rabinovici.
ORF
KZ-prik dschivdo Mongo Stojka o bar use tertschardscha
O „Jazz“ gitaristo Harri Stojka jek le inicijatorendar le gondolipeskere mulatintschagostar ando Barankapark hi. Nipo lestar odotar ledschim taj jek falato lendar murdarde ule.
Le Stojkasiskero dad o Mongo Stojka, savo o logeri prik dschivtscha te palikerel hi, kaj i aguni „Hellerwiese am Belgrad Platz“ ande Favoriten o anav „Barankapark“ uschtidija.
O Mongo Stojka ando 20. maj 1929 ande Guntramsdorf upro them alo. Ov o logertscha Auschwitz-Birkenau, Buchenwald sar Flossenbürg prik dschivtscha. Le Mongo Stojkasiskere nipostar tschak ov, schtar schvistertscha taj leskeri daj o logertscha prik dschivde.
„Tschak schov dschene mra familijatar kher ale“, phenel o Stojka butvar. Leskero terno phral Osi ande Auschwitz mulo, leskero dad ande Dachau murdardo ulo. Kaj 200 leskera familijatar khetan leskera babaha murdarde ule, meg adi na dschanel.
Dietmar Lipkovich
Baranka, i kamli baba
But berscha o Mongo Stojka na pedar i palutni cajt vakerlahi, pedar o manuschengero prasajipe taj pedar i bibastakeri cajt. Ande leskeri erschti kenva „Papierene Kinder“ kesdintscha ov pedar pri familija te phukal taj te pisinel. Baranka, i kamli baba la Stojka familijatar, kaj o Mongo Stojka mindig barikane pedar late phukal. Oj taj o avre leskera familijatar le nacijendar upri „Hellerwiese“ astarde taj ledschim ule.
Ando 4. juni 2004 upri „Wiener Hellerwiese“ i nevi palgondolipeskeri tablina uproda than, kaj vandaltscha o phuro gondolipeskero than pujste tschite, tel utschardo ulo. Kaj oja gondolipeskeri tablina schaj upre terdschardi uli le Mongo Stokaske te palikerel hi, ov igen sorale pe ande beschartscha.
Sajt 9 berscha organisirinel o farajn Voice of Diversity jek gondolipeskero mulatintschago - te le barikane manuscheske Mongo Stojka.
Duzdar | Sensibilisirung le schtotlichi birovtschagendar
Telal o kherodaschtscha te i schtotiskere sekreterkija Muna Duzdar sina, save pe le palgondolipeske le Roma genocidistar taj o paldschumipe le „Antiziganismusistar“ ande i adiveseskeri cajt ande bescharel. Duzdar kamla adale temaha le pradime birovtschago sar le meschterkijen taj meschteren te sensibilisirinel. Amaro upredipe hi te gondolinel taj pal te gondolinel te mukel, phenel i schtotiskeri sekreterkija.