Ökumenischi mischa taj gondolipe ande Holzschlag

Paraschtun gondolinde i gemajndi Holzschlag ando suditiko Burgenland le Romenge, save le nacijonalsocijalistendar murdarde ule. I ökumenischi mischa andi masuni khangeri ande Holzschlag tel likerdi uli.

Zum Nachhören | Roma sam | 31.10.2016

Cajchn le molinipestar, gondolipestar taj pal gondolipestar

O dschene taj fartretertscha la gemajndatar taj la flogoskera grupnatar le Romendar khetan gele le raschajiha Gerhard Harkam, le raschajiha Sebastian Edakarottu taj le bare masune raschajiha Manfred Koch, odolenge te gondolinel, save angle 70 berscha vasch pumaro ethnischi ajipe tradim, ando logertscha ledschim taj odoj upre bibastali koja murdarde ule.

Ande Holzschlag la flogoskera grupn le Romendar restscha. On palo murdaripe nisaj grobo uschtidine taj nisaj manuschanipengero parunipe.

O generalvikar Martin Korpitsch le bare raschaj Ägidius J. Zsifkovics fatretintscha. Ov angle asdija, hot o cile manuscha kada upro them an taj kada meren glajch hi taj andi pativalipe jek cajchn le molinipestar, gondolipestar taj pal gondolipestar pumenge roden.

Ledschipe le Romendar andar Holzschlag

O ledschipe le Romendar andar Holzschlag, kaj o cile upre pisim sina, ande trin koji kerdo ulo. 1939 o butjakere murscha ledschim ule. Andi rat upro 31. oktoberi 1941 i SS/SA o dujto var ali taj le cile Romen andar o khera pumenca line. Ando april 1943 o lejcti Roma, save meg odoj sina ledschim ule. Akan upro temetischi lenge jek gondolipeskeri tablina tel utschardo ulo.

O katholischi raschaj Sebastian Edakarottu o anava le murdarde Romendar angle gentscha.

Paloda o schtar momeltscha andar i ökumenischi mischa upro temetischi mit lim ule, odoj akor o tel utscharipe la neva gondolipeskera tablinatar upro temetischi angle lim uo. Upri gondolipeskeri tablina terdschol: „Amen gondolinas le Romenge taj Romnijenge andar Holzschlag, save maschkar o NS-Teror reschim murdarde ule. Schoha buter haburi! Schoha buter faschismus!“.

Odoj dschene andar Holzschlag vodschikane historiji phukade taj afka palgondolipe kerde upre pumare nochbertscha, save Roma andar o gav sina.

„Kaj mre momeltscha otscha te tschav“

„Kaj mre momeltscha otscha te tschav“, jek inicijativa hi, save le opferenge jek anav taj kipo te del, taj afka esbelipe dim te ol. I inicijativa ando khetan butschalinipe maschkar i diöcese Tikni Martona le Roma-Servicejiha taj le masune taj katholischi khangerendar ando Burgenland kerdo ulo. I Manuela Horvath andar o referat le ethnische grupnendar andi diöcese Tikni Martona phukal pedar mindenfelitike use gejiptscha le gemajndendar usi rejalisirung le gondolipeskere thanendar.

Duach i sendung i Susanne Horvath tumen vodinel.

O arto kurko phukal „Roma sam“ pedar jek interesanti phukajipe le Herbert Brettlistar usi tema „Zigeunerpolitik 1921-1945“, andar Neudorf.