Roma Ball 2019 | Bara tradicijaha

O tradicijoneli Romaball Tenu Erbate, jek sako berscheskero kultureli punkto sina, taj ada imar bojd tranda berscha. Imar ando bersch 1990 kesdim leha ulo dur anglo aunprindscharioe la flogoskera grupnatar. Roma sam o ada berscheskero Roma Ball, savo angle jek kurko Tenu Erbate sina jek dikipe upri palutni cajt tschitscha.

On demand | Roma sam | 28.1.2019

Imar but berscha o Roma Ball ando „Ungarischen Hof“ mojakero tel likerdo ol. Sajt 2017 o Roma Ball le farajnistar KARIKA andar i Erba organisirim ol, kaj o Paul Horvath o schero le farajnistar hi. Ada bersch i banda andar i Slovenija Skupina Del Tuha taj o „Trio Zimmer Kuchl Kabinett“ le kherodaschenge i muschika upro Roma Ball Tenu Erbate kerde.

O Emmerich Gärtner-Horvath taj o Horst Horvath andar o kesdipe le Roma Ballistar, kada lo 1990 kerdo ulo, use sina. O erschti farajn , savo le kertscha taj telikertscha o farajn Roma Erba sina. Ada o kesdipe sina le rodipestar la identitetatar taj kulturatar.

Uso kesdipe na loke sina ada mulatintschago te etablirinel, ham akan O Rom Ball jek interkultureli talalinipe ulo, kaj Roma taj gadsche pumen resen taj arparun. Te o biro Erbatar Georg Rosner mersch upro Roma Ball Tenu Erbate hi.

Ando fatretinipe la burgenlanditika thaneskera regirungatar o thaneskero rot Christian Drobits la SPÖ-atar odoj sina.

Te le thaneskero rotiske Wolfgang Spitzmüller le selenendar igen barikano o Roma Ball hi.

O utschipe le Roma Ballistar sina, o arodipe la Romana kiralkijatar, savi tradicijoneli epaschi i rat kerdo ol. La Romana kiralkijake ando lejcti bersch, Jennifer Papai, o uschtidipe la koronatar na pobisterdo ovla - oj imar ojs tikni kamlahi Romani kiralkija te ol - 2018 o kivanipe lake dim ulo.

Epasch i rat akor asaj dur sina, i Romani tschasarkija 2019 la Elina Aschaberake andar Wiener Neustadt i korona upre beschardi uli. I 16- berschengeri ischkolaschkija asaj bastali sina, kaj o alava lake falinde.