Podiumsdiskussion Arbeitsmarktsituation von Romnja und Roma im offenen Haus Oberwart
ORF
ORF
ROMA SAM | BUTJAKERO FORO

„Prado Drom“ | Diskusijakeri karika usi butjakeri foroskeri situacija Romnjendar taj Romendar

Romnja taj Roma uso butjakero rodipe meg mindig diskriminacija esbe iste len. Adaj o cile dschene la podijumakera diskusijatar ando „Pradimo Kher Erba“ jek hi. I diskriminacija asaj dur dschal, hot poar dschene vasch lengero familijakero anav, buti na uschtiden. Adaj o butjakero projekto „Prado Drom“ aun bescharel.

Podiumsdiskussion im offenen Haus Oberwart
ORF

Duach berotinipe taj kvalificirinipeskere koji, o andschajipe ando butjakero foro, lokeder kerdo te ol. O projekto „Prado Drom“ sajt jeneri 2023 del. Sajt oja cajt, valami 300 berotinipeskere vakeriptscha kerde ule. 17 dschene, save buti rodnahi sina vaj hi ande arsiklojipeskere kurstscha, ande save on ando thana sar butjakero orijentirinipe taj EDV trenirim on. „10 dschene imar o urtschajipe ando butjakero foro schofinde“, afka o dujto projektoskero schero taj butjakero treneri, Martin Horvath.

Martin Horvath
ORF
Martin Horvath | Dujto projektoskero schero taj treneri

Radijo „Roma sam“ | 11to decemberi 2023 | 20:50 orenge

Duach i sendung vodinel Susanne Horvath | Live Radio Burgenland

I inicijativa „Prado Drom“ i phurt maschkar o butjakere dijaschtscha taj o dschene la flogoskera grupnatar le Romendar and te lel taj afka te o usedschajipe uso butjakero foro le Romnjenge taj Romenge, lokeder te kerel. I firma Trendwerk igen but firmtschenca khetan butschalinel, save te meresch Romnjen taj Romen upre len. „Hatek ham te meg mindig angle al, hot poar firmtschendar jek telphenipe del, te on tschak o anav le beverberistar vaj la beverberkijatar schunde. On na phenen konkreti, soske odo dscheno buti andi firma na uschtidel, hatek tschaj jek telphenipe del“, phenel i Eva Schwarzmayer, projektoskero schero le dschenendar le Trendwerkistar Burgenland.

Eva Schwarzmayer
ORF
Eva Schwarzmayer | Projektoskero schero le dschenendar le Trendwerkistar Burgenland

Usi diskusijakeri karika ando „Pradimo Kher Erba“ te o Adolf Gussak use sina. Palo kisetinipe jeke medijengere-bajder sikadipeskere kursistar, butschalinel ov akan andi Roma-redakcijona ando ORF Burgenland. „Agun mindig o gadsche o phukajiptscha pedar o Roma kernahi. Ham kivanim sina, andar o dikipe jeke Romestar vaj jeka Romnjatar te phukal, mint amen i situacija la flogoskera grupntar feder prindscharas taj feder hajojas“, phenel o Gussak.

Adolf Gussak
ORF
Adolf Gussak | Reporteri

O projekto „Prado Drom" ando keripe „"omengeri sor le butjakere foroske 2022-2030“ le bundakere ministerijumistar la butjake taj la virtschoftake, kerdo ulo. Le anglebeschaschiske le flogoskere grupnengere bajrotistar le Romendar, Emmerich Gärtner-Horvath butschol ada, hot meg but te kerel del. „Na tschak o Romnja taj o Roma iste sensibilisirim on, kaj buti te lakel. Te o gadsche sensibilisirim iste on, kaj te dschanen, hot on te Romnjen taj Romen and iste terdscharen“, phenel o Emmerich Gärtner-Horvath.

Emmerich Gärtner-Horvath
ORF
Emmerich Gärtner-Horvath | Bajrotiskero anglebeschaschi la flogoskera grupnatar le Romendar

Ledschaschi le projektostar „Prado Drom“ o butjakero sorjengero famitleri Trendwerk hi. Pomoschago uschtidel o projekto le bundakere ministerijumistar la butjake taj la virtschoftake taj le AMS-iha Burgenland andi koperacijona kerdo lo ol.