Kada ando 9to novemberi 1938 ando cilo nimtschko rajipe prik astariptscha gejng dschidovkiji taj dschidovtscha kerde ule, irintscha pe i organisirimi „flogoskeri holi“ ando Burgenland, paloda o dschidivtscha imar ari tradim ule, gejng o koji le agune dschidovtschengere gemajntschendar.
O sinagogtscha ande Kobersdorf, Rochoncate, Mattersburg taj Tikni Martonate, le gaveskere SA-murschendar pujste tschite ule. Uso aundschivdscharipe vaschoda na alo, kaj o sinagogtscha ando paschipe atschipeskere thanendar sina. Ujvarate, hatek o nacijonalsocijalistscha upro scheroskero than, meblini taj kenvi la gaveskera sinagogatar tharde. Pedar adala periptscha ando regijonali nacijonalsocijalistischi kurkoskere papruschengere neviptscha, nischta te genel nana.
Valami 300 berscha pal lengere keriptscha, o dschidovtschengere gemajntscha ando Burgenland, le nacijonalsocijalitschendar ando linaj 1938, putrim ule. Ande Mattersburg, i aguni lek bareder dschidovtschengeri gemajnde, upri sinagoga jek parni astava uso cajchn vaschoda upre cidim uli, hot nisaj dschido taj nisaj dschidovkija buter ando gav hi. O gauiskero vodaschi Tobias Portschy, savo i nacijonalsocijalistischi-antisemitischi politik igen sik taj bibastale duach beschartscha, phenel ando oktoberi 1938 igen barikano, hot o Burgenland ojs erschti gau ando „rajipe“ imar „dschidovtschendar naphandlo“ hi.