Leskero kamipe le thajipeske, lakla o Robert Weinrich, duach leskeri daj. Oj sina li, savi leske phentscha, hot leskere sune prik te bescharel. O arsiklipe upri tourismusiskeri ischkola Wassermann gaslina, hatek o vudar andi barikani gastronomija pratscha leske. Taj afka butschalinel ov sajt poar berscha ando Hangar-7, kaj ov kolegkijenca taj kolegenca andar o cilo them, upre neve krejacijontscha butschalinel.
O Robert Weinrich dikipe andi tradicijoneli Sintijengeri-kojnha del taj o habe Bokoli presentirinel, saveskere scheroskere koji balengero mas, scha, rischa taj paradajstscha hi. Tradicijoneli Sinti-habiptscha hi, sar o Weinrich phenel, habiptscha save ande jek piri thade on. Scha, paprika taj pereskero mas, adaj uso lek barikaneder koji, genahi.
Radijo „Roma sam“ | 6to novemberi 2023 | 20:50 orenge
Duach i sendung vodinel Susanne Horvath | Live Radio Burgenland
O habe Bokoli mindig Schachaha, jeke tradicijoneli schajiskere habeha, kerdo ol. Avrijal uso scha, sar le andi Austrija upro stolo terdscharde on, ando /Schach buteder koji use hi. Le Weinrich hatek jek tip hi, savo le cilenge barikano schaj ovlahi, savenge o balengero mas na pekal. Jek alternativa hi, kajnhano mas te lel. Kaj te oda, jek scheroskero koja andi Sintijengeri-kojnha hi, na naschal o habe leskeri autenticiteta.
Bokoli ando keripe nan pharo, ham but vasteskere butja, kerde iste on. O islinipe, sar o Weinrich le phenel, le tschatschikane irinipestar le humelistar, tel hejnginel. Ada le vasteha kerdo te ovlahi. Adaj o habeskero phenel, hot jek bareder roj lim te ol.
O habeskero dschanel, hot o dschivipeskere situaciji le Sintijendar, andfojinipe upri kojnha le Sintijendar lija. Afka akor use krejativi adapcijontscha regijonali habiptschendar alo, save te adi, meg andi Sintijengeri-kojnha te lakel hi.
O Robert Weinrich, barikano Sinto hi. Ov prado pedar leskero telschtaminipe vakerel taj meresch leskera kulturatar phukal. O medijali sikajipe la grupnatar, savo pe butvar upro negativi koji koncentririnel, ojs problematischi dikel. Mint, afka o Weinrich, but barikane Roma taj Romnja, Sinti taj Sintize, del.
