Ando septemberi 2020, o Peter Wagner le filmiske „Gehen unter schwebendem Geleise“ upro srastunakero drom maschkar Rohonca taj Uprutni Schica, pe tschitscha. Jek falato adale srastunakere dromestar leskero sako divesesekero ischkolakero drom sina, mint ov Erbate dschivlahi taj o gimnasijum Uprutni Schica, kher rodlahi. Ande oja cajt o Peter Wagner le Stefan Horvath, jek Rom Erbatar, te prindscharel siklino, saveske ov te leskero erschti schunipeskero khelipe le anaveha „Purdi Pista sagt, die Cymbal ist tot“ vidmintscha taj ojs kinstlerischi phuro dad, akarel. Ando film „Unter schwebendem Geleise“, te o palgondolipe adale khetanipestar jek koja khelel.
Radijo „Roma sam“ | 18to septemberi 2023 | 20:50 orenge
Duach i sendung vodinel Susanne Horvath | Live Radio Burgenland
Leskere schunipeskere khelipeha pedar o logeriskero prik dschivdo Rom, Stefan Horvath, o Peter Wagner, jek Romengero-aktivisto la erschti oratar hi, mint, ando maschkaripe le eftavardeschte berschendar, o holocaust upro Romnja taj Roma ando pradipe nisaj tema nana, phenel o Peter Wagner. Poar berscha paloda, o kinstleri poar dschenenca khetan pe kertscha, save adi andar i flogoskeri grupnengeri buti prindscharde hi, telal lende o ORF reporteri Erich Schneller, o historikeri Gerhard Baumgartner vaj i aguni nacijonakeri rotkija le Selenendar, Terezija Stoisitis, tschak poar adaj lendar te akarel. Khetan jek mulatintschagoskero redo le alaveha „Ausnahmsweise Oberwart“ kerde taj te jek gondolipeskeri atrapa anglo haburiskero gondolipeskero than Erbate upre terdscharde, savo o terdschijipe le Romendar andi NS-cajt te sikal. Ande oja cajt, meg nisaj Romengero-gondolipeskero than ando Burgenland na delahi.
Uso aunprindscharipe la flogoskera grupnatar le Romendar angle 30 berscha, nana o Peter Wagner aktivi use. O entvikliniptscha pasche i flogoskeri grupn ham mindig aun peske diklahi. O bombakero atentato 1995 use vodintscha, hot ov pe papal buteder la flogoskera grupnake, and bescharlahi. Trin berscha paloda, pisintscha ov jek teateriskero falato pal i glajchi anaveskeri Romengeri-pamarisi „Die schwarze Kaiserin“.
Bojd 20 berscha paloda, sikatscha ov le Rom taj pisimaschi Stefan Horvath Erbatar ando film „Stefan Horvath, Zigeuner aus Oberwart“, savo ando bersch 2004 ari alo. Jek bersch paloda i „Charly & Pepi Show“, jek komedijakero redo ande Burgenland-Romani, nimtschke telal pisiniptschenca, kertscha. Pasche leskere produkcijontscha, o Peter Wagner te but berscha ando gremijum le agune Roma-farajnistar sina. Ov ham schoha na kamlahi jek vakeraschi le Romendar te ol vaj karitativi buti la flogoskera grupnake te kerel. Butvar pri buti ande oda dikla, le avre dschenen te sensibilisirinel, te vasch i tema Romnja taj Roma dschalahi.
Uso 20-berschengero-jubilejumiskero mulatintschago la flogoskera utscha ischkolatar le Romendar ando bersch 2019, o Peter Wagner jek patijaripe leskera butjake la flogoskera grupnake, te uschtidijahi. O Peter Wagner palikertscha pe, ham o patijaripe aun na lija.
La flogoskera grupnakera cukunftake, kivaninel peske o Peter Wagner jek dschivdono kamipe, savo sorja te entviklinel, kaj bajder koji prik bescharde te on taj kaj la flogoskera grupn taj lakeri kultura, meg igen dugi cajt te del.