Romano Dikipe, 13ti august 2023, 13:05 orenge | ORF 2 Burgenland | Live ORF TVthek
I naschadi Romengeri-sidlung andar Jois
Ando adiveseskero ardipe, Jois ando nord le thanestar, kher rodijam. Odoj Roma taj Lovara, imar sajt o 17to schelberschengero, dschivnahi. Paloda o lek buteder Roma ando Burgenland ando nacijonalsocijalismus murdarde ule, dugi cajt te andar o gondo le manuschendar, le sina. Ande but gava adi buter dschando nan, hot Roma taj Romnja ando gav, delahi. Tumen schunen, sar amaro jomakero rodipe taj i roas andi phuri cajt ande Jois sina, kaj amen pomoschago uschtidijam.
O Romengero-holocaustiskero-gondolipeskero di Erbate
Andi rat usar o 2to upro 3ti august 1944, valami 4000 Roma taj Sinti ando gasiskere khera ande Auschwitz, murdarde ule. Upre lende ando 2to august, o internacijonali gondolipeskero di le Romenge taj Sintijenge, gondolim ol.
Sajt berscha mangel i flogoskeri grupn le Romendar taj Sintijendar, hot ada barikano di te andi Austrija oficijeli ojs gondolipeskero di mulatim te ol – upro EU-jakero than ada imar ando bersch 2015 kerdo ulo. Ando jeneri adale berschestar, akor kerdo lo ulo: O favosinipeskero talalinipe le nacijonakere rotistar, o 2to august, jeke hangoha uso nacijonali gondolipeskero di, aun prindschartscha. Ada bersch, erschtivar Erbate vaschoda jek gondolipeskero mulatintschago le but eseri Romenge taj Sintijenge, save ando nacijonalsocijalismus murdarde ule, tel likerdo ulo.
O 2to august Betschiste
Te ada bersch papal but fatretertscha le Romendar taj la politikatar, upro Ceija-Stojka-than Betschiste reste pumen, khetan upro 500.000 ando nacijonalsocijalismus murdarde Roma taj Sinti, te gondolinel. Kekaj akan o 2to august andi Austrija oficijeli ojs gondlipeskero di aun prindschardo hi, meg mindig o mangipe pal jek khetano centrali gondolipeskero than le opferenge, atschol.
O tradicijoneli Roma-Butschu
O tradicijoneli Roma-Butschu, te ada bersch papal Mischkate tel likerdo ulo. Ada bersch o Roma-Butschu ando cajchn le 30-berschengere jubilejumistar le aunprindscharipestar le Romendar ojs flogoskeri grupn, terdscholahi. O mulatintschago le mindenfelitikostar, muschikaha le burgenlanditike flogoskere grupnendar taj la mindenfelitika Romengera muschikaha, sikal pe. Adaj i banda Romano Rath na tromal te falinel, savi te ada bersch, lakero 30-berschengero jubilejum, mulatinel.
Kevin „Luzifer“ Horvath ando sikavipe
Ov jek, le lek barikaneder dschenendar la flogoskera grupnatar hi. Prindschardo hi o Kevin „Luzifer“ Horvath andar „Reality Shows“ andi Austrija taj Germanija. Leskero baro suno hi, rontschengero keraschi te ol. Akan o burgenlanditiko Rom, harne anglo kesdipe terdschol. Mro kolega Adi Gussak, le Kevin „Luzifer“ Horvath, ande leskero kher ando gav Walbersdorf, jek gaveskero falato andar Mattersburg, kher rodija.
