Jek odole projektendar hi „Thara – Paso po Paso“. I Usnija Buligovic o projektoskero schero use THARA hi. Sajt valami 17 bescha, oj pe le kojenge le Romenge taj Sintijenge usi „Volkshilfe“ and bescharel. Lakeri buti imar maschkar lakeri schtudijumakeri cajt kesdintscha. Palo avipe andi Austrija, i Romani andar i Serbija, lakeri karijera ando NGO-jengero than, kesdinel.
Radijo „Roma sam“ | 11to septemberi 2023 | 20:50 orenge
Duach i sendung vodinel Susanne Horvath | Live Radio Burgenland
Paso po Paso o resultato but berschengere terdschijipestar taj le evalujirinipestar hi. Palo pilotiskero projekto dschando sina, so pekamlo hi. Sajt oja cajt, mindig nevariptscha uso aktujeli pekantschage del, afko o projektoskero schero. O aktujeli dipe butvar ando butjakero- taj sikadipeskero berotinipe paschlol. Pasche, mindenfelitike workshops del, sar o afka akarde „Digi-workshops“. Cil hi o familinipe digitali dschaniptschendar. Le sensibilisirinipeskere-workshoptschenca THARA ham te dschene aun pisinel, save buteder pedar i historija le Romendar taj Sintijendar te dschanel kamna. Paso po Paso ham te jek seletoskero forma le arparujipeske maschkar i flogoskeri grupn taj o avre dschene hi. Pedar ari, o projekto jek bulho socijali berotinipe del. Ada vaschoda pekamlo hi, kaj o Roma taj o Sinti, mindenfelitike problemtschenca konfrontirim hi, afka i Buligovic. Problemtscha dikel o projektoskero schero te ando austritiko sikadipeskero sistemo, savo dschenenge andar i ciliskeri grupn, jek problemo hi.
Hajojipe la historijake taj le kutureli kojenge le Romendar taj Sintijendar o basisakero koja andi buti adala ciliskera grupnaha hi, sar o projektoskero schero phenel. O berotinipe ande mindenfelitike tschibtscha kerdo ol, afka te ande Romanes. Taj kekaj o sikadipeskero terdschojipe telal o betschitiko Romengero-khetanipe palo phukajipe la Buligovicatar meg mindig hor hi, jek positivi bilanca ando dikipe upro butjakere foroskere projekti cidel. O jerinpe ando tiknipe te dikel hi. Afka mindig buteder dschene andar i flogoskeri grupn del, save pumaro arsiklipe latschipeha kisetinen.