EMRO – Empowerment für Roma und Romnia butschol o butjakero foroskero projekto la Caritasatar Schtacko. Pharipeskere punktscha hi o entviklinipe taj prikbescharipe le kojendar uso kvalificirinipe Romendar taj Sintijendar. O schero le projektostar o Michael Teichmann hi.
Radijo „Roma sam“ | 4to septemberi 2023 | 20:50 orenge
Duach i sendung vodinel Susanne Horvath | Live Radio Burgenland
Le Teichmanniske, savo imar te uso erschti butjakero foroskero projekto la Caritastar Schtacko use sina, i khetanipeskeri buti o mogo le jerinipestar hi. O klutscho paschlol, afka o projektoskero schero, andi barikani khetani buti le kolegkijenca taj kolegenca andar i Romengeri-grupn. Afka o klijentkiji taj klijentscha le Romnjendar Tina Friedreich taj Csilla Höfler, pomoschago uschtiden. Ham te phendo ol, hot i kontinujiteta barikani hi. Ada duach o ardipe „Romengeri sor le butjakere foroske 2022-2030“ dim hi.
O dikipe use EMRO upro entviklinipe taj prikbescharipe le kojendar uso kvalificirinipe paschlol. Afka pasche o butjakero- taj sikadipeskero berotinipe te kurstscha la nimtschka tschibtschake, alfabetisirinipeskere kurtschta taj avre kvalificirinipeskere kurstscha del. Butvar o rasismus, i diskriminacija taj sterejotiptscha, le Romen taj Romnjen usi integracijona, te upro butjakero foro, upre likeren, sar le o Teichmann dschanel. Kaj odola koji upri rik le avre dschenendar tel baunim te on, pasche podijumakere diskusiji te workshops ischkolaschkijenge taj ischkolaschenge del.
Le avre duj projektenca Charvore taj Romexa ando Schtacko, kisetinel EMRO jek cilo dipe. Cil hi, na tschak le bare dschenenge, hatek imar le tschavenge te pomoschinel taj lenge afka, o andschajipe ando butjakero foro, lokeder te kerel.