Sajt o kesdipe le berschestar 2023 o projekto „Va an Va“ ande Salzburg del, savo jek butjakero foroskero projekto le Romenge taj Sintijenge hi. O pharipeskero punkto le projektostar upro butjakero foroskero pomoschago usi integracija la ciliskera grupnatar ando austritiko butjakero foro paschlol. Probalim ol, oda pomoschago te del, savo le butjakere andschajipeske pekamlo hi, sar i Gerlinde Hörl phukal.
Ojs projekto, savo pomoschago le bundakere ministerijumistar la butjake taj la virtschoftake uschtidel, jek glajchi ulajipe le manuschendar andar o tschulipe ande barikane posicijontscha, angle dim hi. Afka o projekto „Va an Va“ andi nimtschki tschib „Hand in Hand“, la Vesna Kilomake taj la Alina Kuglerake, dschivdi praksis hi. So duj, imar but berscha le Romengere taj Sintijengere kojenge ande Salzburg, and pumen bescharen. I Vesna Kilmo Romni hi taj i tschaj serbitike kherodaschengere butschaschtschendar. Kada li meg tikni sina, iste pe oj ande jek avrethaneskeri regijona duach beschartscha. Pedar ari, imar ando terne berscha, anticiganismusiha konfrontirim ol. I Kilmo imar sajt berscha le Romengere-grupnenca ande Salzburg, latsche fanecim hi. Barikano hi, afka i Romni, hot Roma taj Sinti usedschajipe use relevanti informaciji uso butjakero tschatschipe andi Austrija, uschtiden.
Radijo „Roma sam“ | 22to maj 2023 | 20:50 orenge
Duach i sendung vodinel Susanne Horvath | Live Radio Burgenland
Te lakeri kolegkija, Alina Kugler, andi socijali buti, butschalinel. Oj imar ande mindenfelitike Romengere-projekti aktivi sina, afka sar usi Romengeri-organisacija Phurdo. Lakera butjake, i schtudirimi socijali butschaschkija, muguli i rumenitiki tschib te siklol kesdintscha. Sako manusch individujeli aun te dikel hi, phenel i Kugler. Dschanipe peder i historija adale flogostar, pedar o sklavinipe vaj o genocid maschkar i NS-diktatura, hajojipe anel.
O projekto upro mangiptscha, save upro butjakero foro del, dikel. Kekaj afka hi, jek holistischi aunbescharipe, savo bulho upro pekantschage le dschenendar dikel, del. Avrijal sar medijali phukado, na ol tschak le afka akarde tschore roasinaschtschenge pomoschim, sar i Kugler phenel. I situacija ande Salzburg igen kompleksi hi. Afka mindenfelitike Romengere- taj Sintijengere grupn, mindenfelitike socijali virtschoftlichi kojenca, del.
La nimtschka, rumenitika, romana taj serbitika tschibtschaha, o butschaschkiji, but dschenen andar o Romengere-grupn, aun vakeren. Jek dugeder cajtakero aunpaschlojipe la Alina Kugleratar, jek upre bauninipe jeke ajgeni fatretinipestar ande Salzburg, ovlahi. Afka te o autochtoni Roma taj Sinti akarde hi, pumen te mejdinel.