Radijo „Roma sam“ | 10to april 2023 | 20:50 orenge
Duach i sendung vodinel Susanne Horvath | Live Radio Burgenland
Kada o Forum4Burgenland kerdo ulo, o cil peske beschartscha, o burgenlanditike flogoskere grupnengere tschibtscha ando pradipe te ledschel taj ando sikadipekero than te soraljarel. Diklo upro 4 tschibtscha le Burgenlandistar, te o anav le forumistar ar rodim ulo. I Pedagogischi Utschi Ischkola Burgenland sikavipeskere dschene ar sikal, save ando duj tschibtschakero ischkolakero koja o flogoskere grupnengere tschibtscha sikan. Taj andi „tschibtschakeri verkschtot“, khetan le flogoskere grupnengere fatreterenca, siklipeskere materijaltscha le ischkolalschkijenge taj le ischkolaschenge kerde on, phenel i rektorkija la Pedagogischi Utscha Ischkolatar Burgenland, Sabine Weisz.
Imar angle 25 berscha o tschuliptschengero ischkolakero tschatschipe ando parlamento kerdo ulo. Ada phenel, hot sakone ischkolaschi taj sakona ischkolaschkija o tschatschipe hi, o flogoskere grupnengere tschibtscha horvacko, ungriko taj Burgenland-Romani andi ischkola te siklol. I sikadipeskeri thaneskeri rotkija Daniela Winkler la SPÖ-jatar phenel, hot o flogoskere grupnengere tschibtscha te la burgenlanditika identitetake igen barikane hi.
Korkore ando lejcti bersch ando Burgenland 4097 ischkolaschkiji taj ischkolaschtscha dija, save ande jek le trin flogoskere grupnengere tschibtschendar, sikade ule. O duj tschibtschakero bundakero gimnasijum Erba, barikano vert upre bescharel, le ischkolaschtschen ande duj tschibtscha ar te sikal. Odoj o schajipe del, o flogoskere grupnengere tschibtscha ungriko taj horvacko, dschi usi matura latsche te siklol. I direkterkija Iris Zsótér kivaninel peske, hot o vert le but tschibtschakere vakeripestar prindschardo ol.
Ando Burgenland-Romani imar te sikajipeskere materijaltscha la tschavengera barake taj la flogoskera ischkolake del, kaj te i tschib ojs „naphandlo siklipe“ del. I matura ande Burgenland-Romani ham naschtig tel tschiti ol. Adaj meschtertscha taj meschterkiji pekamle hi taj jek schtandartisirimi jekoschni tschib andi Europa, phenel o Emmerich Gärtner-Horvath, anglebeschaschi le flogoskere grupnengere bajrotistar le Romendar.
Uso kisetinipe le ada beschengere Forum4Burgenland talalinipestar, kheliptscha la ungrika flogoskera khelipeskera grupnatar le duj tschibtschakere bundakere gimnasijumistar Erba, dija.