Na tschak, kaj dosta than del taj kaj jek schukar kher hi, o Horst Horvath o „OHO“ leskere mulatintschagoske ar rodija. Leske, o adiveseskero autonomi kunstakero kher, jek barikanipe hi. Ando kisetinipe le 80te berschendar, ov o aguno ternengero kher prik lija taj use jek centrum la kunstake, la kulturake taj le khetanipeskere politischi tematschenge, le kertscha. Buteder sar 1000 mulatintschage o „Tausendsassa“ imar adaj organisirintscha.
O Horst Horvath ando 2to merc 1963 upro them alo. Leskero tschavoripe ande leskero hajmatakero gav Neudörfl an der Leitha terdschivtscha. Imar andi ischkola, kontakto use Roma le sina. Ande leskero ternipe kesdintscha o siklimo verkcajgiskero keraschi politisch te butschalinel taj ov, afka sar uso terne socijalistscha, uso geverkschoftakero ternipe taj uso Lole Falki sina. Imar ande oja cajt, le rasismusiha taj le faschismusiha donde pe bescharlahi. Ando kesdipe le 80te berschendar, organisirintscha ov o lek bareder politischi naphandlo uprephiripe la dujta republikatar. Use jek partajakero di le agune presidentschoftiskere kandidatistar Norbert Burger andi Tikni Martona.
Radijo „Roma sam“ | 20to merc 2023 | 20:50 orenge
Duach i sendung vodinel Susanne Horvath | Live Radio Burgenland
1992 o Horst Horvath Betschiste akardo ulo, uso organisacijonakero khetanipe le ududiskere bare pajiske, te butschalinel. Ando 23ti jeneri 1993, akor valami 300000 manuscha momeltschenca taj faklinenca gejng o avrothemutno flogoskero aunpaschlojipe la FPÖ-jatar, phirde. Aja dschijakana i lek bareder demonstracijona andi Austrija sina. Erbate, o Horst Horvath ojs butjakero foroskero vodinaschi, butschalintscha. Ande leskere kurstscha, butvar terne Roma sina. Erschtivar i diskriminacija taj o argranicalipe le flogoskere grupnengere dschenendar ande oja forma, esbe lija. 1999 i Roma VHS Burgenland kertscha.
O Horst Horvath meg mindig ande mindenfelitike projekti butschalinel. Ando nord del o Cselley mlino le projektoha „eu-art-network“ taj i „dis Fochtenstein fantastischi“. Ando becirk Erba usi gondolipeskeri inicijativa „RE.F.U.G.I.U.S.“ Rohoncate aktivi hi lo taj te o keraschi le falogistar „edition lex liszt 12“. Adala ham meg nan o cile projekti, kaj le Horst Horvathiskere anguschtscha ando khelipe hi.
Privati, dschil o Horst Horvath ande jek khetan kedimi familija. Le trin tschavore hi. O duj tikneder deschujek taj deschuefta berscha phurane hi. O phureder Michael butschol, trandaduj berscha phurano hi taj andar jek aguno khetanipe al. Leskeri familija o mirnipeskero than ande leskero dschivipe hi taj i sor le but projektenge leske del.
O Horst Horvath leskere dschivipeskere motoske „Horvath heißt Orwat“ te andi cukunft patijardo atschla. Mint te ov ande poar berscha andi pensijona gelo, ojs naphandlo patijardo butschaschi bajder te butschalinel kamla, asaj dur sar dschal.