Phendo schaj ol, hot o Tony Wegas jek upre terdschojipeskero murschoro la austritika muschikakera industrijatar hi. Kekaj pal tschalajiptscha terdschivtscha, schoha na naschatscha ov pro drom andar o atscha. Erscht ando lejcti bersch i dijagnosa parne bukengero utscho dschumintschago uschtidija, jek nasvalipe, savo dschi adi te sastjarel nan. O Wegas iste paloda pro cilo ileto irintscha. Ov pro habe irintscha, loke kesdintscha papal schpurt te kerel taj 40 kilo tel lija. Adi papal feder leske dschal. Afka te sikatscha pe uso muschikakero merc ando thaneskero schtudijo Burgenland. Khetan la kolegkijaha Eva Maria Marold i dschili „A Rocking Good Way“ le Shakin Stevensistar taj la Bonnie Tyleratar, dschilatscha.
I Eva Maria Marold na dschanel tschak te dschilal. I godschakeri daj duj tschavendar, jek dscheno hi, savo but koji ando showakero dschivipe te kerel dschanel. Oj khelel, teateri khelel, use televisakere produkcijontscha use hi li taj kabaretiskere falati pisinel. Lakero lek neveder projekto „Radikal Inkonsequent“ butschol taj ando oktoberi 2023 ari al. Lakere kolega Tony Wegas imar igen dur prindscharel. "Me leskeri muschika kamav, sajt me le erschtivar te dschilal schuntschom, phenel i Marold.
Radijo „Roma sam“ | 13ti merc 2023 | 20:50 orenge
Duach i sendung vodinel Susanne Horvath | Live Radio Burgenland
O Tony Wegas, ando 3ti maj 1965 andi Telutni Schica telal o anav Anton Hans Sarközi, upro them alo. Ov andar jek muschikakeri familija al. Facauberim leskere dadestar, savo muschikaschi sina, imar agun o instrumentscha gitara, klavir taj dobo, siklino. Leskero lek bareder idol o britanitiko Pop-, Country- taj Soul-muschikaschi Tom Jones sina.
O dschilaschi na kamlahi pe ande nisaj muschikakeri ladlina and te tschil te mukel, ov pro mindenfelitiko talento ande mindenfelitike muschikakere riktscha te sikal kamlahi. Prindscharipe uschtidija o Tony Wegas duach o Eurovision Song Contest, kaj ov dujvar la Austrijake dschilatscha. Ando bersch 1992 andi Schvedija la dschilaha „Zusammen geh’n“, savi o Dieter Bohlen komponirintscha, o 10to than ande lija. Jek bersch paloda ande Irland la dschilaha „Maria Magdalena“ o 14to than la Austrijake schofintscha.
O Tony Wegas use pri identiteta taj use pre Romengere-vurclini terdschol. Leskero dad ando logeri Lackenbach upro them alo taj te but avre familijakere dschene, odoj and tschapim sina. O entviklinipe la flogoskera grupnatar ando lejcti 30 berscha, sajt o aunprindscharipe andi Austrija, positivi dikel.
O Tony Wegas but bibastale koji ande leskero dschivipe terdschivtscha. Adaj mindig leskeri daj pasche leske terdscholahi. Oj dschi adi te leskeri agentkija hi. O adi 56-berschengero barikano muschikaschi, Betschiste dschil taj akan upre jek nevi CD butschalinel, savi meg ada bersch, ari te al.