30kero Romano-Mulatintschago Mischkate

Latschi muschika, latscho hango taj jek na mujsimo khetanipe, te ada bersch papal uso imar 30kero Romano-Mulatintschago dija. Le berschenca o mulatintschago use jek kultureli barikano sikajipe la flogoskera grupnake pe entviklintscha. Le gadschen adaj o schajipe hi, buteder pedar i mindenfelitiki kultura le Romendar te schunel, afka o keraschi, Martin Horvath le farajnistar „HANGO ROMA“.

O erschti Romano-Mulatintschago ando bersch 1991 ando Pradimo Kher Erba, mulatim ulo. Ada te o kesdipe sina, kaj i flogoskeri grupn lakeri kultura te ando pradipe sikatscha taj dschivdon kertscha. Taj te o kesdipe sina, but kultureli projektendar taj jek schajipe le ternenge, lengeri identiteta ojs flogoskero grupnengero dscheno le Romendar te lakel, afka o Emmerich Gärtner-Horvath, bajrotiskero anglebeschaschi la flogoskera grupnatar le Romendar.

Te o Horst Horvath usi organisacija le erschti Romane-Mulatintschagostar ando Pradimo Kher Erba, use sina. O mulatintschago mindig feder use jek interkultureli talalinipe pe entviklintscha, afka o botakero vodaschi la Roma VHS-atar Burgenland.

Erschtivar Romano Kirali uso Romano-Mulatintschago del

Jek igen barikano koja uso Romano-Mulatintschago hi, o völinipe la Romana-Mulatintschagoskera-Kiralkijatar. Upro mangipe le Romendar, o organisatortscha phende, hot ada bersch erschtivar te jek Romano-Mulatintschagoskero-Kirali völim ol. Hatek afka o jurortscha le 16-berschengere Adi Gussak andar Neudau taj la 15-berschengera Timea Schmidt Simehatar, ojs jerinaschtscha angle terdscharde. Lengeri buti hi akan, jek bersch la flogoskera grupn le Romendar, ando pradipe te fatretinel taj te representirinel.

Pasche o prindscharde burgenlanditike Romengere-bandi, Romano Rath taj Leon Berger Band, o Elvis Presley imitatori Pal Csaba andar o Ungriko, latscho hango telal o kherodaschtscha, antscha.

O Romano-Mulatintschago te ada bersch, papal jek barikano jerinipe sina. Roma taj gadsche, khetan dschi hora ratschaskero mulatinahi taj khelnahi.