O imar mulo, prindschardo burgenlanditiko reporteri, Erich Schneller, savo te andi flogoskeri grupnengeri scena aktivi sina, kada meg dschivlahi, ada pedar o Hans Samer pisintscha: „Ov erschtivar manusch sina, upre savo schaj genehahi, jek loschando, vodschikano, jek, savo meresch telal o manuscha taj le vodschiha muschikaschi sina.“ Jek, leskere lejcti bare cidipestar, sina le Hans Samer uso mulatintschago uso 90to berschengero jubilejum le Burgenlandistar andi Informakeri hala Erbate. I tschib Burgenland-Romani leskera muschikaha ando pradipe te presentirinel taj afka i kultura la flogoskera grupnatar upre te likerel, leske jek baro aunpaschlojipe sina, sar ov te ande jek vakeripe uso Romengere-Kurke Erbate, ando bersch 2005, phentscha.
O Hans Samer, ando 13ti april 1948, andi Telutni Schica upro them alo. Ov o dujto le schtar tschavendar le logeriskere prik dschivdendar, Franz taj Gisela Sarközi, sina. I muschika mindig vodinlahi le, sajt ov upro them alo. Leskero erschti instrumento o pischot sina. Imar ando aguno ternipe, ov pre dadeha taj odoleskere muschikaschenca, upre mindenfelitike mulatintschage, cidlahi. Kada ov vasch leskero anav nisaj arsiklipeskero than uschtidija, i daj o anav Sarközi upre Samer, te irinel mukla. Hatek, o Hans Samer akor jek arsiklipe ojs inschtalateri kisetintscha. Palo soharipe la Anna Maria Theresia Karolyaha ando bersch 1968, o Hans Samer o Burgenland pal peste mukla, Betschiste gelo taj odoj but deschberschengere usi gemajnde, butschalinlahi.
Radijo „Roma sam“ | 30to jeneri 2023 | 20:50 orenge
Duach i sendung vodinel Susanne Horvath | Live Radio Burgenland
O Hans Samer, imar ande leskero ternipe, ande mindenfelitike bandi cidlahi. Leske ojs giteraschi, i akor upre ali rockiskeri muschika, tecinlahi. Leskero muschikakero mindenfelitiko taj leskero pradipe use oda vodintscha, hot ov ande mindenfelitike bandi, Romenca taj gadschenca, cidlahi. Le formacijonenca „Wild Cats", His Masters Voice“ taj „Sunny Boys“, o Hans Samer ando Burgenland taj ando Schtacko, te schunel sina. Ando bersch 1990, o kinstleri i „Hans Samer Band“ kertscha. La andar i Slovakija ala schogorkijaha, Eva Samer-Berkyova, la banda jek dschilaschkija taj jek igen barikani hegedujaschkija, sina. Hatek, taj lake te palikerel hi, hot o Hans Samer, mindig buteder pe uso muschikakere tradiciji leskera flogoskera grupnatar, irintscha.
O Hans Samer, khetan leskere kusiniha, le imar mule Rudolf Sarköziha, uso keripe le kulturakere farajnistar le austritike Romendar, use sina. O Rudolf Sarközi o aunprindscharipe la flogoskera grupnatar angle tradlahi, savi ada bersch lakero 30-berschengero jubilejum mulatinel. O Hans Samer o muschikakero botschofteri le Romendar taj o barikano muschikakero dscheno la flogoskera grupnatar sina. Leskera muschikaha ande oja cajt, ov use jek barikano ledschaschi le kulturakere farajnistar kerinlahi, phenel o Rudolf Sarközi ande jek vakeripe andar o agune 90te berscha.
Pal leskero pensijonirinipe ando bersch 2008, o Hans Samer ando Burgenland pal alo taj Erbate dschivlahi. Leskere keripeha usi flogoskeri utschi ischkola le burgenlanditike Romendar, la flogoskera grupnake and pe bescharlahi taj meg mindig te ojs muschikaschi, aktivi lo sina. Ando 22to decemberi 2012, o Hans Samer mulo. Ov 64 berscha phurano ulo taj leskera dschuvla taj duj tschaven, pal mukla.