opera Vanessa ide kitom, OHO
ORF
ORF
ROMA SAM | KULTURA

„Vanessa dschal uso valtscha“ | Sikajipe la road operatar ando OHO

Silvesteri ando Pradimo Kher Erba, i road opera „Vanessa dschal uso valtscha“ sikadi uli. O falato la temaha, i aktujeli situacija amare planetostar, hatek o gondo amara cajtatar, resel. Kerdo taj pisim ulo o falato le burgenlanditike reschiseristar Peter Wagner. I muschika use komponirintscha o kinstleri taj Rom, Ferry Janoska andar Neusiedl am See.

Michaela Khom u ulogi Vanessi
ORF
Michaela Kohm | Protagonistin

O ardschajipeskero punkto la road operatar „Vanessa dschal uso valtscha"le Peter Wagneristar, jek tschatschikani historija jeke mule valistar, 40 kilo plastikiha andi dschomra, hi. Kada i protagonistkija Vanessa, kheldo la Michaela Kohmatar, ando internet upre oda bibastalo nevipe perel, o marhi, save ando baro paj dschin, sananinen lake taj vaschoda oj upri roas pe kerel, lenge te pomoschinel. Oj adaj dukade kojenca amara cajtatar konfrontirim ol. Schtacijontscha pherda autognosijatar taj mulipeskere mangipestar, an. O tekst i bibastali rejaliteta papal sikal, afka i scheroskeri khelaschkija, Michaela Kohm.

opera Vanessa ide kitom, Peter Wagner
ORF
Peter Wagner | Pisimaschi taj reschiseri

O Peter Wagner la operaha "Vanessa dschal uso valtscha“ jek verk kertscha, savo o aktujeli phare gondi terne taj phureder manuschendar pedar amaro dschivipeskero than, savo fogosimo hi, upre sikal. Ov i road opera inscenirintscha taj te o libreto kertscha. Palo sikajipe, o Peter Wagner jek lokipe esbe lija taj pedar i muschika, savi o Ferry Janoska kertscha, tschak ando lek feder hangi vakerlahi, savo pre hangenca, i opera use jek vodschikani historija kertscha.

Radijo „Roma sam“ | 16to jeneri 2023 | 20:50 orenge

Duach i sendung vodinel Susanne Horvath | Live Radio Burgenland

O Peter Wagner, ojs adiveseskero kinstleri, jek barikano hango andi austritiki literatura hi. Kekaj uso falato „Vanessa dschal uso valtscha“ o phukajipe te prindscharel hi, na kamla o pisimaschi le kherodaschkijenge taj kherodaschtschenge, jek sikavipe prik te del.

Ferry Janoska
ORF
Ferry Janoska | Komponisto

O barikano komponisto Ferry Janoska, savo ando cile falati la muschikatar kher hi, o hango le libretostar le Peter Wagneristar, kertscha. Prindscharipe uschtidija o Janoska, duach leskeri buti le betschitike filharmonikerenca taj te le betschitike simfonikerenca. Te la muschikaha le Romendar, o 63-berschengero, intensivi donde pe beschartscha. Ando bersch 2004, o Theodor Kery patijaripe uschtidija. Leskere hangijenca, ov le handlinipeske la road operatar „Vanessa dschal uso valtscha“, barikanipe taj horipe del.

opera Vanessa ide kitom, OHO, muzički ansambl
ORF

Silvesteri, uso sikajipe, o Pradimo Kher Erba, dschi upro lejcti than, pherdo sina. Le but kherodaschtschenge o jekoschne falati la operatar tecinde taj schukar kirati terdschivde. I jek vaj i kija, schaj peske te valaso khere mit lija.

opera Vanessa ide kitom, OHO
ORF

I road opera „Vanessa dschal uso valtscha“, use oda falato le khetanipestar pe irinel, savo le upre bartschime manuschenge o them afka kertscha, sar ov pe adi sikal. I Vanessa andar i generacija „Fridays for Future“ al, hatek andar oja generacija manuscha, savi peske tschatschikane phare gondi vasch amari natura kerel. Hatek jek tema hi, savi terne taj phureder manuschenge interesanti schaj ol. I opera „Vanessa dschal uso valtscha“, jek produkcijona la teateriskera inicijativatar Burgeland taj le Pradime Kherestar Erba, hi.