Sako kurko, i mischa la gemajndejatar „Kangeri Ekklesia Betschi“ ando 21to betschitiko gemajndejakero becirk, tel likerdi ol. I mischa mindig ande Romani tel likerdi taj andi nimtschki tschib prik berschardi ol. Manuscha, sakone telschtaminipestar taj sakona etnijatar, vodschikan andi Romengeri gemajnde akarde hi. Te khetane aktivitetscha del taj barikane programtscha le ternenge, kaj te o arte generaciji le patschajipeha taj la kulturaha ando aunvastaripe te an, phukal o Boris Kolompar.
Radijo „Roma sam“ | 2to jeneri 2023 | 20:50 orenge
Duach i sendung vodinel Susanne Horvath | Live Radio Burgenland
Dschimeg ov jek bersch phurano sina, o Boris leskera dajaha taj leskere dadeha, ande jek Romengero gheto andi Eks-Jugoslavija, dschivlahi. Odoj o Roma igen phari diskriminacija terdschivde taj o lek buteder lendar, naschtig andi ischkola gele. Ando bersch 1971, i daj taj o dad le Borisistar, leha taj leskere phenjenca taj phralenca andi Austrija ale taj ojs kherodaschtschengere butschaschtscha, butschalinahi. Betschiste, o adiveseskero naphandlo krist, i ischkola kertscha taj paloda jek arsiklipe ojs moleri. Uso patschajipe lakla ov ande jek phari cajt leskere dschivipestar. Ando bersch 2015 akor leskero tejologijakero schtudijum kisetintscha taj jek arsiklipe uso selsorgeri, kertscha.
O patschajpe taj o kamipe uso Del o maschkarutno punkto ando dschivipe le 52-berschengere flogoskere grupnengere dschenostar le Romendar hi. Sajt deschuduj berscha, ov akan dscheno andi Romengeri-khangerijakeri gemajnde, hi. O khetanipe, leske jek barikano koja hi. Ov butbar o khetan likeripe le manuschendar patijarel. O socijali na sorale dschene la gemajndejatar ande bibastale dschivipeskere situaciji, tikne, schpontani kojenca, pomoschago uschtiden vaj dschanipeha taj keripeha pomoschim ol. Butvar o aktujeli utsche koschtaliniptscha, but manuschenge, te andi Romengeri-khangerijakeri gemajnde Betschi, briga anen.
Le berscheske 2023 kivaninel peske o tejologo Boris Kolompar, hot meg buteder manuscha andi „Romani Kangeri“ an, i mischa andi Romani tschib te mulatinel taj te terdschil. Ov peske te kivaninel, hot o avre dschene buteder interesi upri kultura la flogoskera grupnatar le Romendar, sikan. Afka, gondolinel ov, feder hajojipe taj feder khetanipe dela.