Familija, boschitschano kascht taj o sung frischne pekle boschitschane pekipestar: Afka boschitscha prindscharas. Tumenge jefkar feder te dschal“, ada o baro kivanipe mra babatar taj mre papustar sina, use save amen upre bartschijam. So duj o bibastalo holocaust prik dschivde. Andi adventiskeri cajt mre phrala taj me, ratschaskero angli ischkola, andi sako diveseskeri rorate dschahahi. Oja jek mischa sina, andi tikni kapona, savi igen boschitschani kerdi sina. O dschene mindig asaj schukar dschilavlahi.
Radijo „Roma sam“ | 26to decemberi 2022 | 20:50 orenge
Duach i sendung vodinel Susanne Horvath | Live Radio Burgenland
Andi Kedveschni Rat use amende mindg jek khetano ratschaskero habe andi kojnha delahi. Sa, imar le kiratiske kisetim sina taj amari baba na kamlahi, hot odoj maroskere breslini te paschlon. Me meg dschanav, hot amen asaj biteschni samahi, hot nischta te hal na dschanahahi. Kada me paloda la babaha o stolo tel kedijom, o papu mre phralenca o botschitschano kascht andar o vesch hulintscha taj upre le terdschartscha. Mindig eknaj cajt pekamli sina, dschimeg o kascht latsche terdscholahi taj leskeri lek schukeder rik, angle sikavlahi. Akor, amen tschave, tromtscham le upre te schuscharel. Phusane tscherhena, kuglini, tikne kaschtune figurtscha, lameta taj te i schpicn, delahi. I schpicn o papu upro kascht tschivlahi, amen tschave na samahi meg asaj bare, kaj schaj le kertschamahi.
Akor andar o kher iste gejam. Pal mende, amari baba o vudar tel tschapintscha. Hatek, amen ham duach i klutschoskeri hef dikahahi, ham nischta na diklam. Andi Kedveschni Rat, paloplaneske, akor ari bitschade ujam. Amen akor sanja te ladel gejam, oda mindig bari voja sina. Agun mindig but dschiv delahi. O cile tschave le gavestar avaral sina. Paloda sapane taj fadschim kher ajam.
Mirne akor andi kojnha uscharahahi. Tschoralo, i baba o momeltscha aun dschivdschartscha taj le harangoha, harangoslinahi. Hatek, akor ando kher tromtscham. Bare atschenca, o diptscha aun amenge dikahai, save amenge amari baba dija. Butvar tschoralo, kada amen andi ischkola samahi, vastale taj gutschmi kertscha. Poavar te barikane diptscha dija. Jefkar, somnakune kaneskere kariki uschtidijom taj mre phrala jek srastuni. Amen igen loschantscham amen pedar taj amara baba taj amare papu, tel tschumidahahi. Palo dipeskero prik dipe, khetan hajam taj televisa dikahahi.